ന്യൂഡല്‍ഹി: മനുഷ്യാവകാശ കമ്മിഷന്റെയും രാജ്യത്തെ പ്രമുഖ ആക്ടിവിസ്റ്റുകളുടെയും ശക്തമായ ഇടപെടലുകള്‍ കൊണ്ട് ദേശീയശ്രദ്ധപിടിച്ചുപറ്റിയ ബില്‍കീസ് ബാനു കൂട്ടബലാല്‍സംഗ കേസില്‍ പ്രതികളുടെ ശിക്ഷ ഹൈക്കോടതി ശരിവയ്ക്കാന്‍ സഹായിച്ചത് ഇരകളുടെ മൊഴി.
അഞ്ഞൂറോളം പേരടങ്ങുന്ന സംഘപരിവാര്‍ അക്രമി സംഘം 2002 മാര്‍ച്ച് മൂന്നിനു ചപ്പര്‍വാദിലെ കൊച്ചുപുര വളഞ്ഞതുമുതലുണ്ടായ സംഭവങ്ങള്‍ വിവരിച്ച് ബില്‍കീസ് നല്‍കിയ മൊഴി സമൂഹമനസാക്ഷിയെ ഞെട്ടിക്കുന്നതായിരുന്നു.
കുടുംബത്തില്‍ ആകെയുണ്ടായിരുന്ന 17 പേരില്‍ മൂന്നാളുകളെ മാത്രമെ അക്രമികള്‍ ബാക്കിവച്ചുള്ളൂ. ബില്‍കീസും സഹോദരിയും ഉമ്മയും അടക്കം നാലുസ്ത്രീകളും അതില്‍ ഉള്‍പ്പെടും. ഇവരെയെല്ലാവരെയും ആ സംഘം മാറിമാറി ബലാല്‍സംഗം ചെയ്‌തെന്നും അവരുടെ മൊഴിയില്‍ പറയുന്നു.

മൊഴിയുടെ സംക്ഷിപ്ത രൂപം

രണ്ടുവയസ്സുള്ള മകള്‍ സാലിഹയുടെ രണ്ടുകാലുകളും കൂട്ടിപ്പിടിച്ച് തറയിലടിച്ചാണ് അക്രമികള്‍ കൊന്നത്. അക്രമികള്‍ വരുമ്പോള്‍ എന്റെ കൈയിലായിരുന്നു മകള്‍. ഉടന്‍ അവര്‍ തന്റെ കൈയില്‍ നിന്നും അവളെ പിടിച്ചുവാങ്ങി നിലത്തടിച്ചു കൊന്നു.
നാല് പുരുഷന്‍മാരെ കഴുത്തറുത്ത് കൊലപ്പെടുത്തി. ഞാനടക്കമുള്ളവരെ ലൈംഗികമായി പീഡിപ്പിച്ചു. അക്രമികള്‍ തങ്ങളുടെ കൈവശമുണ്ടായിരുന്ന ഇരുമ്പുദണ്ഡുകള്‍ ഉപയോഗിച്ച് മര്‍ദ്ദിച്ചു. മരിച്ചെന്ന് തെറ്റിദ്ധരിച്ച് താനടക്കമുള്ളവരെ കുറ്റിക്കാട്ടില്‍ ഉപേക്ഷിക്കുകയായിരുന്നു. ആക്രമണം അഴിച്ചുവിടുമ്പോള്‍ നിന്ദ്യമായ പദപ്രയോഗങ്ങളും അവര്‍ നടത്തി. ബോധം തിരിച്ചുകിട്ടുമ്പോഴേക്കും മണിക്കൂറുകള്‍ കഴിഞ്ഞിരുന്നു. ഒരുദിവസത്തിലേറെ ഭക്ഷണമൊന്നും കിട്ടാതെ ആ കാട്ടില്‍ തന്നെ കഴിഞ്ഞു. ഏറെപണിപ്പെട്ട് തൊട്ടടുത്തുള്ള കോളനിയിലെത്തി ഹിന്ദുപേര് പറഞ്ഞാണ് അഭയം തേടിയത്.
പിന്നീട് ഭര്‍ത്താവിനൊപ്പം മനുഷ്യാവകാശ പ്രവര്‍ത്തകരുടെ സഹായത്തോടെ ബില്‍കീസ് ബാനു നടത്തിയ നിയമയുദ്ധം ദേശീയശ്രദ്ധ പിടിച്ചുപറ്റുകയായിരുന്നു.