കോഴിക്കോട്: പ്രശസ്ത നാടകപ്രവര്‍ത്തകന്‍ സഫ്ദര്‍ ഹാശ്മി അവസാനമായി അഭിനയിച്ച 'ഹല്ലാബോല്‍' എന്ന നാടകത്തിന്റെ നാമഥേയത്തില്‍ നടക്കുന്ന കാലിക്കറ്റ് യൂനിവേഴ്‌സിറ്റി ഇന്റര്‍സോണ്‍ കലോത്സവത്തിന് തിരിതെളിയാന്‍ ഇനി ദിവസങ്ങള്‍ മാത്രം. എട്ട് മുതല്‍ പന്ത്രണ്ട് വരെ മലബാര്‍ ക്രിസ്ത്യന്‍ കോളജിലും ഐ.എച്ച്.ആര്‍.ഡി കോളജിലുമാണ് മത്സരങ്ങള്‍ നടക്കുന്നത്.
കോഴിക്കോട്ടെ എട്ട് വിവിധ സ്ഥലങ്ങളുടെ പേരുകളിലാണ് മത്സരവേദി ഒരുങ്ങുന്നത്. മാനാഞ്ചിറ, മിഠായിത്തെരുവ്, കാപ്പാട്, പാളയം, ബേപ്പൂര്‍,വലിയങ്ങാടി, കല്ലായി, കോഴിക്കോട് കടപ്പുറം എന്നിവയാണവ. വൈക്കം മുഹമ്മദ് ബഷീറിന്റെ പേരിലാണ് കലോത്സവ നഗരി അലങ്കരിക്കപ്പെടുന്നത്. അഞ്ച് വേദികളിലായി സ്റ്റേജ് മത്സരങ്ങളും മൂന്ന് വേദികളില്‍ സ്റ്റേജിതര മത്സരങ്ങളുമാണ് നടക്കുക.
 സംഘനൃത്തം, കോല്‍ക്കളി, ദഫ്മുട്ട്, മാപ്പിളപ്പാട്ട് എന്നിവ മാനഞ്ചിറയിലും മിഠായി ത്തെരുവിലുമായി നടക്കും. മാനേജ്‌മെന്റ് വിദ്യര്‍ഥി പ്രശ്‌നങ്ങളും മറ്റ് വിദ്യാര്‍ഥി പ്രശ്‌നങ്ങളും നിലനില്‍ക്കുന്ന സാഹചര്യത്തില്‍ 'ശബ്ദമുയര്‍ത്താം  സര്‍ഗാത്മക കലാലയങ്ങള്‍ക്കായി' എന്ന സന്ദേശം ഉയര്‍ത്തിപിടിച്ചു കൊണ്ടാണ് കലോത്സവം അരങ്ങേറുന്നത്.
കോഴിക്കോട്, വയനാട്, മലപ്പുറം, പാലക്കാട്, ത്യശൂര്‍, ലക്ഷദ്വീപ് എന്നീ ആറ് സോണുകളില്‍ നിന്നായി 3000 ത്തോളം കലാപ്രതിഭകള്‍ മാറ്റുരയ്ക്കും. 67 മത്സര ഇനങ്ങളാണ് ഉള്ളത്. ആണ്‍കുട്ടികള്‍, പെണ്‍കുട്ടികള്‍ എന്നീവിഭാഗങ്ങളിലായി 103 മത്സരങ്ങള്‍ നടക്കും. അഞ്ച് വര്‍ഷത്തിനു ശേഷമാണ് കോഴിക്കോട് വീണ്ടും കലോത്സവത്തിന് വേദിയാവുന്നത്.