എടപ്പാള്‍: കഴിഞ്ഞ ദിവസം രാത്രി പെയ്ത കനത്ത മഴയിലൂടെ ഒഴുകിയെത്തിയത് നിരവധി പ്ലാസ്റ്റിക് കുപ്പികള്‍. ഇതില്‍ പകുതിയിലധികവും മദ്യക്കുപ്പികള്‍. എടപ്പാള്‍-പൊന്നാനി റോഡിലെ കാനയിലാണ് പ്ലാസ്റ്റിക് കുപ്പികള്‍ വന്നടിഞ്ഞത്.
മദ്യപാനികള്‍ ആവശ്യം കഴിഞ്ഞ് കുപ്പികള്‍ കാനയിലേക്ക് തള്ളുന്നതാണ് ഇത്തരത്തില്‍ വന്‍തോതില്‍ കുപ്പികള്‍ കാണപ്പെടാന്‍ കാരണമായത്. ചെറുതും വലുതുമായ നിരവധി മദ്യക്കുപ്പികളാണ് വന്നടിഞ്ഞത്. പ്ലാസ്റ്റിക് പരിസ്ഥിതിയ്ക്ക് ദോഷം വരുത്തിവയ്ക്കുമെന്ന് അറിഞ്ഞിട്ടും ഇത്തരം പ്രവൃത്തി ചെയ്യുന്നവര്‍ക്കെതിരേ നടപടി സ്വീകരിക്കാത്തപക്ഷം വന്‍വിപത്തിലേക്കാണ് നാട് നീങ്ങിക്കൊണ്ടിരിക്കുന്നത്. പുനരുപയോഗത്തിന് തദ്ദേശ സ്വയംഭരണ സ്ഥാപനങ്ങളില്‍ സംവിധാനങ്ങള്‍ ഒരുക്കിയിട്ടുണ്ടങ്കിലും ഇത്തരത്തില്‍ കാനയില്‍ തള്ളുന്ന അജൈവ മാലിന്യങ്ങള്‍ കണ്ടത്തുവാന്‍ കഴിയാതെ പോകുകയാണ്.