ചങ്ങരംകുളം: സംസ്ഥാന പാതയില്‍ കാറിലിടിച്ച് നിയന്ത്രണം നഷ്ടപ്പെ ആംബുലന്‍സ് ബൈക്ക് യാത്രികനെ ഇടിച്ച് തെറിപ്പിച്ചു. അപകടത്തില്‍ ബൈക്കില്‍ യാത്ര ചെയ്തിരുന്ന ചങ്ങരംകുളം സ്റ്റേഷനിലെ സിവില്‍ പൊലിസ് ഓഫിസര്‍ക്ക് പരിക്കേറ്റു. ചങ്ങരംകുളം സ്റ്റേഷനിലെ സി.പി.ഒ പൊന്നാനി സ്വദേശി മധു(35)നാണ് പരുക്കേറ്റത്.
പരുക്കേറ്റ മധുവിനെ നാട്ടുകാര്‍ ചേര്‍ന്ന് എടപ്പാള്‍ ശ്രീവത്സം ആശുപത്രിയില്‍ പ്രവേശിപ്പിച്ചു. കുറ്റിപ്പുറം-തൃശൂര്‍ സംസ്ഥാന പാതയില്‍ പന്താവൂര്‍ കാളാച്ചാല്‍ പാടത്ത് തിങ്കളാഴ്ച വൈകിട്ട് മൂന്ന് മണിയോടെയാണ് അപകടം. എടപ്പാള്‍ ഭാഗത്തേക്ക് വന്നിരുന്ന ആംബുലന്‍സ് എതിരേ വന്ന കാറില്‍ ഇടിച്ച് നിയന്ത്രണം നഷ്ടപ്പെട്ട് കാറിന് പുറകില്‍ വന്നിരുന്ന പൊലിസുകാരന്‍ സഞ്ചരിച്ച ബൈക്കില്‍ ഇടിക്കുകയായിരുന്നു. മുന്‍പ് ചങ്ങരംകുളത്തെ പുതുതായി നിര്‍മിച്ച റോഡില്‍ രൂപപ്പെട്ട കുഴിയില്‍ വീണ് കൈക്കുണ്ടായ പരുക്കില്‍ ശസ്ത്രക്രിയ നടന്നതിനെ തുടര്‍ന്ന് നീണ്ട അവധിക്ക് ശേഷം തിരിച്ചെത്തി അധികമാകുന്നതിനു മുന്‍പാണ് വീണ്ടും പൊലിസുകാരന് അപകടം സംഭവിക്കുന്നത്.