ഇരിക്കൂര്‍: ബ്ലാത്തൂര്‍ മഞ്ഞാങ്കരിയില്‍ സര്‍വിസ് നടത്തുകയായിരുന്ന ഓട്ടോറിക്ഷ കത്തിനശിച്ചു. യാത്രക്കാരും ഡ്രൈവറും അപകടത്തില്‍നിന്ന് അത്ഭുതകരമായി രക്ഷപ്പെട്ടു.
കഴിഞ്ഞ ദിവസം രാവിലെ 10.30 ഓടെയായിരുന്നു സംഭവം. മണ്ണിയിലെ മനത്താനത്ത് ലക്ഷ്മണന്റെ ഓട്ടോറിക്ഷയാണ് റോഡില്‍ കത്തിനശിച്ചത്. മൂന്ന് യാത്രക്കാരുമായി മണ്ണേരി തിരൂരില്‍ നിന്ന് ബ്ലാത്തൂര്‍ ടൗണിലേക്ക് പോവുകയായിരുന്നു.
മഞ്ഞാങ്കരി ടൗണ്‍ ജുമാമസ്ജിദിനു സമീപത്തെത്തിയപ്പോള്‍ ഓട്ടോറിക്ഷയില്‍ നിന്ന് പുക ഉയരുന്നത് കണ്ട് നിര്‍ത്തുകയായിരുന്നു. മൂന്ന് യാത്രക്കാരും പ്രൈവറും പുറത്തേക്ക് ഇറങ്ങി നിമിഷങ്ങള്‍ക്കകം പൂര്‍ണമായും കത്തി പൊട്ടിത്തെറിച്ചു. ഇരിട്ടിയില്‍ നിന്നു അഗ്‌നിശമനസേന എത്തുമ്പോഴേക്കം ഓട്ടോ പൂര്‍ണമായും കത്തിച്ചാമ്പലായിരുന്നു. ഇരിക്കൂര്‍ എസ്.ഐ മനോജിന്റെ നേതൃത്വത്തില്‍ പൊലിസ് സ്ഥലത്തെത്തി അന്വേഷണം നടത്തി.