റായ്പൂര്‍: ഏതാനും മാസങ്ങള്‍ക്കകം നിയമസഭാ തെരഞ്ഞെടുപ്പ് നടക്കാനിരിക്കേ ഛത്തിസ്ഗഡില്‍ റായ്പൂര്‍ ജില്ലാ കലക്ടര്‍ ജോലി രാജിവച്ച് ബി.ജെ.പി ടിക്കറ്റില്‍ മത്സരിക്കാനൊരുങ്ങുന്നു. 2005 ബാച്ച് ഐ.എ.എസ് ഉദ്യോഗസ്ഥന്‍ ഒ.പി ചൗധരിയാണ് രാജിവച്ച് നിയമസഭാ തെരഞ്ഞെടുപ്പിനെ നേരിടാനൊരുങ്ങുന്നത്. ഇതിന് മുന്നോടിയായി ഉടന്‍തന്നെ ബി.ജെ.പിയില്‍ ചേരുമെന്നും അദ്ദേഹം അറിയിച്ചു. തന്റെ ജന്മനാടായ റായ്ഗഡിലായിരിക്കും മത്സരിക്കുകയെന്നാണ് വിവരം. അതേസമയം ഇതുസംബന്ധിച്ച വിവരങ്ങള്‍ അറിയില്ലെന്നാണ് ബി.ജെ.പി നേതാക്കള്‍ പറയുന്നത്. എന്നാല്‍ ഉദ്യോഗസ്ഥരെ സ്വാധീനിച്ച് തെരഞ്ഞെടുപ്പില്‍ മത്സരിപ്പിക്കുന്ന രീതിയിലുള്ള രാഷ്ട്രീയ നീക്കം നടത്തുന്നത് ശരിയായ രീതിയല്ലെന്ന് കോണ്‍ഗ്രസ് വക്താവ് ശൈലേഷ് നിതിന്‍ ത്രിവേദി ആരോപിച്ചു.