ന്യൂഡല്‍ഹി: ബാബരി മസ്ജിദ് തകര്‍ത്ത കേസില്‍ വിധി പറയാനുള്ള അവസാന തിയതി സുപ്രിം കോടതി സെപ്റ്റംബര്‍ 30 വരെ നീട്ടി. കേസ് പരിഗണിക്കുന്ന ലഖ്‌നോ സി.ബി.ഐ പ്രത്യേക കോടതി ജഡ്ജി സുരേന്ദ്രകുമാര്‍ യാദവിന്റെ അപേക്ഷ പ്രകാരം ജസ്റ്റിസുമായ രോഹിങ്ടണ്‍ നരിമാന്‍, നവീന്‍ സിന്‍ഹ എന്നിവരടങ്ങിയ ബെഞ്ചിന്റെതാണ് നടപടി.

ഓഗസ്റ്റ് 31നകം വിധി പറയണമെന്ന മുന്‍ ഉത്തരവ് തിരുത്തിയാണ് സെപ്റ്റംബര്‍ അവസാനം വരെ നീട്ടി നല്‍കിയത്. കേസിന്റെ നടപടികള്‍ അന്തിമഘട്ടത്തിലാണെന്ന് ജസ്റ്റിസ് സുരേന്ദ്രകുമാര്‍ യാദവ് സുപ്രിം കോടതിയെ അറിയിച്ചു. ഇതു സംബന്ധിച്ച പുരോഗതി റിപ്പോര്‍ട്ടും സമര്‍പ്പിച്ചു.

കഴിഞ്ഞ മെയിലാണ് ജസ്റ്റിസുമാരായ നരിമാരും സൂര്യകാന്തും അടങ്ങുന്ന ബെഞ്ച് ജഡ്ജിയുടെ അപേക്ഷയുടെ അടിസ്ഥാനത്തില്‍ ഓഗസ്റ്റ് 31വരെ സമയം അനുവദിച്ചിരുന്നത്. കേസില്‍ പ്രതികളുടെ മൊഴി രേഖപ്പെടുത്തുന്ന നടപടി ഇപ്പോള്‍ അന്തിമ ഘട്ടത്തിലാണ്. കൊവിഡ് കാലമായതിനാല്‍ ഓണ്‍ലൈനിലൂടെയാണ് പ്രതികളെ കോടതി മുന്‍പാകെ ഹാജരാക്കുന്നത്. ബി.ജെ.പി നേതാക്കളായ എല്‍.കെ അഡ്വാനി, മുരളി മനോഹര്‍ ജോഷി, ഉമാഭാരതി, കല്യാണ്‍ സിങ് തുടങ്ങിയവരാണ് കേസിലെ പ്രധാന പ്രതികള്‍.