കല്‍പ്പറ്റ: ലോക്‌സഭാ തിരഞ്ഞെടുപ്പിന്റെ മൂന്നാംഘട്ട വോട്ടെടുപ്പ് പൂര്‍ത്തിയായപ്പോള്‍ വയനാട്ടിലെ തോട്ടം-ആദിവാസി മേഖലകളില്‍ മികച്ച പോളിങ്. രാവിലെ ഏഴുമുതല്‍ തന്നെ പോളിങ് ബൂത്തിനു മുന്നില്‍ സമ്മതിദായകരുടെ നീണ്ടനിര രൂപപ്പെട്ടിരുന്നു.
പോളിങ് അവസാനിക്കുന്ന വൈകീട്ട് ആറുവരെ മഴയെ അവഗണിച്ചും ഈ നില തുടര്‍ന്നു. തോട്ടംമേഖലയായ മേപ്പാടി ചുളിക്ക ഗവ. എല്‍.പി സ്‌കൂളില്‍ സജ്ജീകരിച്ച 163, 164, 165 നമ്പര്‍ ബൂത്തുകളില്‍ രാവിലെ ഒന്‍പതിന് യഥാക്രമം 13.35, 20, 22.92 ശതമാനം എന്നിങ്ങനെ പോളിങ് രേഖപ്പെടുത്തി.
മേപ്പാടി ഗ്രാമപ്പഞ്ചായത്തിലെ അരണമല കാട്ടുനായ്ക്ക കോളനിയില്‍ നിന്നുള്ള 103 പേര്‍ക്കും മീനാക്ഷി എസ്‌റ്റേറ്റിലെ 165ഓളം തമിഴ് വംശജര്‍ക്കും ഇവിടെയായിരുന്നു വോട്ട്. വനത്തിനുള്ളിലെ പരപ്പന്‍പാറ ചോലനായ്ക്ക കോളനിയില്‍ നിന്നുള്ള 18 പേരും ശേഖരന്‍കുണ്ട് കാട്ടുനായ്ക്ക കോളനിയിലെ സമ്മതിദായകരും വടുവന്‍ചാല്‍ ചിത്രഗിരി എല്‍പി സ്‌കൂളില്‍ വോട്ട് ചെയ്തു. ഭിന്നശേഷി സൗഹൃദമായിരുന്നു ഇത്തവണത്തെ ലോക്‌സഭാ തിരഞ്ഞെടുപ്പ്. ഭിന്നശേഷിക്കാര്‍, വാര്‍ധക്യസഹജമായ ബുദ്ധിമുട്ട് അനുഭവിക്കുന്നവര്‍ എന്നിവരുള്‍പ്പെടെ പരസഹായം ആവശ്യമുള്ളവരെ വോട്ടിങ് കേന്ദ്രത്തിലെത്തിക്കാന്‍ സൗകര്യമൊരുക്കിയിരുന്നു.
അതാതു ബൂത്തുകളില്‍ ഭിന്നശേഷിക്കാരുടെ ലിസ്റ്റ് അനുസരിച്ച് ബിഎല്‍ഒമാര്‍ ഫോണില്‍ നേരിട്ട് ബന്ധപ്പെട്ട ശേഷം സജ്ജമാക്കിയിട്ടുള്ള വാഹനത്തില്‍ വോട്ടിങ് കേന്ദ്രത്തിലും തിരികെ വീടുകളിലും എത്തിച്ചു.
ജില്ലാ ഭരണകൂടത്തിന്റെ നേതൃത്വത്തില്‍ എല്ലാവിധ സജ്ജീകരണങ്ങളും പോളിങ് ബൂത്തുകളില്‍ ഒരുക്കിയിരുന്നു. മാതൃകാ പോളിങ് ബൂത്തുകളില്‍ വോട്ടര്‍മാര്‍ക്കായി ഇരിപ്പിടങ്ങളും കുടിവെള്ള സൗകര്യവും ഏര്‍പ്പെടുത്തി. പെരുമാറ്റച്ചട്ടം നിലവില്‍ വന്നതുമുതല്‍ കര്‍മനിരതരായ ഉദ്യോഗസ്ഥരും 'സ്വീപ്' ബോധവല്‍ക്കരണ പ്രവര്‍ത്തനങ്ങളും പോളിങ് ശതമാനം ഉയര്‍ത്തുന്നതില്‍ പ്രധാന പങ്കുവഹിച്ചു.
കേന്ദ്ര-സംസ്ഥാന സേനകളുടെ മേല്‍നോട്ടത്തില്‍ കനത്ത സുരക്ഷയിലായിരുന്നു പോളിങ്. പ്രശ്‌നബാധിതമെന്നു കണ്ടെത്തിയ 72 ബൂത്തുകളില്‍ ത്രിതല സുരക്ഷയാണ് ഒരുക്കിയിരുന്നത്.