പാറക്കടവ്: കുറുവന്തേരിയില്‍ മുസ്‌ലിം ലീഗ് പ്രവര്‍ത്തകനായ യുവാവിനു നേരെ വധശ്രമം. പള്ളിയിലേക്ക് പോകുംവഴി നടുക്കണ്ടി മഹ്മൂദിനു നേരെയാണ് വധശ്രമം. കോണ്‍ഗ്രസ് പ്രവര്‍ത്തകനായ പുന്നോറത്ത് അസീസാണ് അമേരിക്കന്‍ നിര്‍മിതമായ ബാറ്റണ്‍ കത്തി ഉപയോഗിച്ച് വധിക്കാന്‍ ശ്രമിച്ചതെന്ന് അറിയുന്നു.
സുഹൃത്തായ ഇസ്മായില്‍ അസീസിന്റെ കൈയില്‍നിന്ന് കത്തി പിടിച്ചുമാറ്റിയതിനാലാണ് വെട്ടേല്‍ക്കാതെ രക്ഷപ്പെട്ടതെന്ന് ദൃക്‌സാക്ഷികള്‍ പറഞ്ഞു. വ്യക്തിവൈരാഗ്യം കാരണം വധിക്കാന്‍ ശ്രമിച്ചെന്നാണു പരാതി.
മര്‍ദനത്തില്‍ പരുക്കേറ്റ മഹ്മൂദിനെ നാദാപുരം ഗവ. ആശുപത്രിയില്‍ പ്രവേശിപ്പിച്ചു. വളയം പൊലിസ് കേസെടുത്ത് അന്വേഷണം ആരംഭിച്ചു. പരുക്കേറ്റ മഹ്മൂദിനെ മുസ്‌ലിം ലീഗ് ജില്ലാ വൈസ് പ്രസിഡന്റ് അഹമ്മദ് പുന്നക്കല്‍, പഞ്ചായത്ത് സെക്രട്ടറി സി.എച്ച് ഹമീദ് സന്ദര്‍ശിച്ചു.