കല്‍പ്പറ്റ: കലക്ടറേറ്റ് റിലീഫ് കളക്ഷന്‍ സെന്ററില്‍ കഴിഞ്ഞ രണ്ടാഴ്ച്ചയോളമായി മുഴുവന്‍ സമയവും സേവന സന്നദ്ധനായി ഒരാള്‍ ഓടിനടക്കുന്നുണ്ട്.
ആന്ധ്ര ബാങ്ക് കല്‍പ്പറ്റ ശാഖയില്‍ കാഷ്യറായി ജോലി ചെയ്യുന്ന ജന്മനാ മൂകനും ബധിരനുമായ നജീം. നജീമിന്റെ സേവന സന്നദ്ധയ്ക്കു മുമ്പില്‍ മറ്റെല്ലാ കുറവുകളും തോറ്റു പോകും. കലക്ടറേറ്റ് റിലീഫ് കളക്ഷന്‍ സെന്ററില്‍ രാവിലെയെത്തിയാല്‍ മിക്കവാറും ഏറ്റവും അവസാനം മടങ്ങുന്നതും നജീമായിരിക്കും. ഉദ്യോഗസ്ഥരുടെയടക്കം പ്രശംസ നേടിയ നജീമിനെ മിക്ക ദിവസവും പിരിഞ്ഞു പോകുമ്പോള്‍ സബ് കലക്ടര്‍ എന്‍.എസ്.കെ ഉമേഷ് അന്വേഷിക്കുന്നതും കാണാം. ഒടുവില്‍ ഇരുവരും സലാം പറഞ്ഞാണ് പിരിയുക. അരിയടക്കമുള്ള ഭാരം കൂടിയ ലോഡിറക്കുന്നതിനും മാലിന്യങ്ങള്‍ മാറ്റി വയ്ക്കുന്നതിനടക്കം നജീമിന്റെ കരങ്ങളുണ്ടാവും. ബാങ്ക് കല്‍പ്പറ്റ ശാഖയില്‍ നിന്നും ആന്ധ്രയിലേക്ക് പ്രൊമോഷന്‍ കിട്ടിയെങ്കിലും നാടിനേയും നാട്ടുകാരെയും വിട്ടു പോകാന്‍ മനസു സമ്മതിക്കുന്നില്ലെന്നാണ് നജീമിന്റെ പക്ഷം. മക്കളില്ലാത്ത നജീമും ഭാര്യ സൗഭ്യയും കല്‍പ്പറ്റ എമിലിയിലാണ് താമസിക്കുന്നത്.