തിരുവനന്തപുരം: കൊവിഡ് ബ്രിഗേഡിന്റെ ആദ്യ സംഘം പരിശീലനം പൂര്‍ത്തിയാക്കി സേവനത്തിനിറങ്ങുന്നു. കാസര്‍കോട്ടെ കൊവിഡ് പ്രതിരോധ പ്രവര്‍ത്തനങ്ങള്‍ക്കായി 26 പേരടങ്ങുന്ന സംഘം ഇന്ന് യാത്രതിരിക്കും.

 രാവിലെ 10ന് സെന്‍ട്രല്‍ സ്റ്റേഡിയത്തില്‍ നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ സംഘത്തെ അഭിസംബോധന ചെയ്ത് യാത്രയാക്കും. മന്ത്രി കെ.കെ ശൈലജ അധ്യക്ഷത വഹിക്കും. തിരുവനന്തപുരം മെഡിക്കല്‍ കോളജില്‍ ഡോ. എസ്.എസ് സന്തോഷ്‌കുമാറിന്റെ നേതൃത്വത്തിലാണ് കൊവിഡ് ബ്രിഗേഡിലെ അംഗങ്ങള്‍ക്ക് സി.എഫ്.എല്‍.ടി.സികളില്‍ നേരിട്ടുള്ള പരിശീലനം നല്‍കിയത്. 

ഇന്‍ഫെക്ഷന്‍ കണ്‍ട്രോള്‍, ബേസിക് ലൈഫ് സപ്പോര്‍ട്ട്, എയര്‍വേ മാനേജ്‌മെന്റ്, അഡ്വാന്‍സ്ഡ് എയര്‍വേ മാനേജ്‌മെന്റ്, മെഡിക്കല്‍ പ്രോട്ടോകോള്‍, കൊവിഡ് പ്രോട്ടോകോള്‍, സാംപിള്‍ ടെസ്റ്റിങ്, സുരക്ഷാ മാനദണ്ഡങ്ങള്‍, പി.പി.ഇ കിറ്റിന്റെ ഫലപ്രദമായ ഉപയോഗം തുടങ്ങിവയിലായിരുന്നു പരിശീലനം. 

ഫസ്റ്റ് ലൈന്‍ ട്രീറ്റ്‌മെന്റ് സെന്ററില്‍ ആവശ്യമായ ഡോക്ടര്‍മാര്‍, നഴ്‌സുമാര്‍, ഫാര്‍മസിസ്റ്റ്, ലബോറട്ടറി ടെക്‌നീഷ്യന്‍, മറ്റ് ആരോഗ്യ പ്രവര്‍ത്തകര്‍ തുടങ്ങിയവരാണ് ബ്രിഗേഡിലെ അംഗങ്ങള്‍.  അതേസമയം, അടുത്ത ബാച്ചിന്റെ പരിശീലനം മെഡിക്കല്‍ കോളജില്‍ ആരംഭിച്ചു. തീവ്രപരിചരണ വിഭാഗങ്ങളില്‍ ജോലി ചെയ്യുന്നവര്‍ക്ക് ഐ.സി.യുവില്‍ നേരിട്ടുള്ള 10 ദിവസത്തെ പരിശീലനമാണ് നല്‍കുന്നത്.