ഫറോക്ക്: കൊളത്തറ റഹ്മാന്‍ ബസാര്‍ ചെരിപ്പ് അപ്പര്‍ സ്റ്റിച്ചിങ് യൂനിറ്റില്‍ പാചക വാതക സിലിണ്ടര്‍ പൈപ്പില്‍ തീപിടിത്തം. മോഡേണ്‍ കമ്പനിക്കു സമീപം ആര്‍.ഡി ഫൂട്‌വെയര്‍ സ്റ്റിച്ചിങ്‌സില്‍ ഉച്ചയ്ക്ക് ഒന്നോടെയാണ് അഗ്നിബാധയുണ്ടായത്. സിലിണ്ടര്‍ സ്റ്റൗവിലേക്കു ഘടിപ്പിച്ച പൈപ്പും നിര്‍മാണ സാധന സാമഗ്രികളും കത്തിച്ചാമ്പലായി.
കമ്പനിയിലെ ഇതരസംസ്ഥാന തൊഴിലാളികള്‍ ഉച്ചഭക്ഷണം പാചകം ചെയ്യുന്നതിനിടെയാണ് പൈപ്പിലേക്കു തീ പടര്‍ന്നത്. ഭീതിയിലായ തൊഴിലാളികള്‍ പുറത്തേക്ക് ഇറങ്ങിയോടി.
ബഹളം വച്ചതോടെ നാട്ടുകാര്‍ കമ്പനിയിലെത്തി നോക്കിയപ്പോള്‍ പാചക വാതക സിലിണ്ടര്‍ പൈപ്പില്‍ നിന്നു തീ ആളിക്കത്തുകയായിരുന്നു. മീഞ്ചന്തയില്‍ നിന്നെത്തിയ സേനാംഗങ്ങള്‍ അഗ്നി പ്രതിരോധ സംവിധാനമുപയോഗിച്ച് തീയണച്ചു.