കൊണ്ടോട്ടി: തദ്ദേശ സ്ഥാപനങ്ങളിലേക്കുളള തെരഞ്ഞെടുപ്പില്‍ വോട്ടര്‍പട്ടികയില്‍ പേര് ചേര്‍ക്കാനുളള രണ്ടാംഘട്ട സമയപരിധി ഇന്ന് അവസാനിക്കും. കഴിഞ്ഞ 12 നാണ് വോട്ടര്‍ പട്ടികയില്‍ പേര് ചേര്‍ക്കല്‍,ആവശ്യമായ മാറ്റം വരുത്തല്‍ തുടങ്ങിയവക്കാണ് രണ്ടാംഘട്ട അവസരം നല്‍കിയത്. ഇന്നലെ വരെ രണ്ട് ലക്ഷത്തോളം അപേക്ഷകളാണ് പുതുതായി ലഭിച്ചത്. ഇവരില്‍ ഹിയറിങ്ങ് നടപടികള്‍ സെപ്തംബര്‍ 23നുളളില്‍ പൂര്‍ത്തിയാക്കി 26 നാണ് അന്തിമ വോട്ടര്‍പട്ടിക പ്രസിദ്ധീകരിക്കുന്നത്. പുതിയ അപേക്ഷകളും ഹിയറിങ്ങും ഓണ്‍ലൈനിലായതോടെ വാര്‍ഡ്,ബൂത്ത് അടിസ്ഥാനത്തില്‍ പരമാവധി വോട്ടര്‍മാരെ ചേര്‍ക്കാന്‍ രാഷ്ട്രീയ പാര്‍ട്ടികള്‍ക്കായിട്ടുണ്ട്.
സാധാരണയായി തെരഞ്ഞെടുപ്പ് വിജ്ഞാപനം വന്ന് ഏതാനും ദിവസങ്ങള്‍ വരെ വോട്ടര്‍പട്ടികയില്‍ പേര് ചേര്‍ക്കാന്‍ അവസരം നല്‍കാറുണ്ട്.എന്നാല്‍ കൊവിഡ് മൂലം ഇത്തവണ തെരഞ്ഞെടുപ്പിന് മൂന്ന് മാസം മുന്‍പ് തന്നെ നിര്‍ത്തുകയാണ്.വോട്ട് ചേര്‍ക്കാന്‍ കൂടുതല്‍ സമയം അനുവദിക്കണമെന്ന ആവശ്യപ്പെട്ട് രാഷ്ട്രീയ പാര്‍ട്ടികളും രംഗത്തെത്തിയിട്ടുണ്ട്.