നെടുമങ്ങാട്: അമ്മയേയും മകനേയും വെട്ടിപ്പരുക്കേല്‍പ്പിച്ച കേസിലെ പ്രതിയെ അറസ്റ്റ് ചെയ്തു. കരകുളം മുദിശാസ്താംകോട് കാവടിത്തലയ്ക്കല്‍ ഇടപ്പറമ്പില്‍ വീട്ടില്‍ രാഹുലിനേയും (23) അമ്മ പുഷ്പയേയും വെട്ടിപ്പരുക്കേല്‍പ്പിച്ച കേസില്‍ ഇവരുടെ ബന്ധുവായ കരകുളം പുളളിക്കോണം ചെക്കക്കോണം കീഴേവിള പുത്തന്‍വീട്ടില്‍ ഷാജിയെ (47)യാണ് അരുവിക്കര പൊലിസ് അറസ്റ്റ് ചെയ്തത്.
ചൊവ്വാഴ്ചയാണ് സംഭവം നടന്നത്. രാവിലെ വലിയമ്മയുടെ വീട്ടില്‍പോയി ബൈക്കില്‍ മടങ്ങി വരികയായിരുന്ന രാഹുലിനെയും പുഷ്പയേയും ഷാജിയുടെ വീടിന് മുന്നില്‍ വെച്ച് ബൈക്ക് തടഞ്ഞു നിര്‍ത്തി വെട്ടുകത്തി കൊണ്ട് വെട്ടിപരുക്കേല്‍പ്പിക്കുകയായിരുന്നുവെന്ന് പൊലിസ് പറഞ്ഞു.
ഇവരെ പേരൂര്‍ക്കട ജില്ലാ ആശുപത്രിയില്‍ പ്രവേശിപ്പിച്ചു. വസ്തു സംബന്ധിച്ച തര്‍ക്കങ്ങളാണ് ആക്രമണത്തിന് പിന്നിലെന്ന് പൊലിസ് പറഞ്ഞു. അരുവിക്കര സി.ഐ അനില്‍കുമാര്‍, എസ്.ഐ മണികണ്ഠന്‍ നായര്‍, സീനിയര്‍ സി.പി.ഒ.മാരായ വിധുകുമാര്‍, പത്മരാജ്, ഷാജിത്ത്, സി.പി.ഒ. ഷംനാദ് എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.