ആലപ്പുഴ: വീടുകള്‍ വാസയോഗ്യമാണെന്നുറപ്പാക്കാതെ ദുരിതാശ്വാസ ക്യാംപുകളില്‍ കഴിയുന്ന കുട്ടനാട്ടുകാരെ തിരിച്ചയയ്ക്കുന്നത് അംഗീകരിക്കില്ലെന്ന് കെ.സി വേണുഗോപാല്‍ എം.പി. കുട്ടനാട്ടിലെ ഉള്‍പ്രദേശങ്ങളുടെ സ്ഥിതി ദയനീയമാണ്.
കൈനകരി, പുളിങ്കുന്ന് പോലുള്ള പ്രദേശങ്ങളിലെ വീടുകളിലെ വെള്ളം കെട്ടിനില്‍ക്കുന്ന അവസ്ഥയാണ്. ഈ സാഹചര്യത്തില്‍ ജനങ്ങളെ ക്യാമ്പുകളില്‍ നിന്നും വീടുകളിലേക്ക് തിരിച്ചയച്ചാല്‍ സാംക്രമിക രോഗങ്ങള്‍ പടര്‍ന്നുപിടിക്കുന്ന അവസ്ഥയുണ്ടാകുമെന്നു കെ.സി. വാര്‍ത്താ സമ്മേളനത്തില്‍ പറഞ്ഞു.
28, 29 തീയതികളില്‍ കുട്ടനാട്ടില്‍ നടത്തുമെന്ന് പ്രഖ്യാപിച്ചിട്ടുള്ള ശുചീകരണം സംബന്ധിച്ച തീരുമാനം സര്‍ക്കാര്‍ ഏകപക്ഷീയമായി കൈക്കൊണ്ടതാണ്. ഇതുമായി ബന്ധപ്പെട്ട് ജനപ്രതിനിധികളുടെ യോഗം വിളിക്കുകയോ മറ്റ് ആലോചനകള്‍ നടത്തുകയോ ചെയ്തിട്ടില്ല. കുട്ടനാട്ടിലെ വീടുകളില്‍ നിന്നും ജലം ഇറങ്ങണമെങ്കില്‍ പാടശേഖരങ്ങളിലെ ജലനിരപ്പ് താഴണം. വൈദ്യുതിയടക്കമുള്ളവ ഉറപ്പാക്കേണ്ടതുണ്ട്.
പാടശേഖരത്തില്‍ നിന്നും ജലം വറ്റിക്കുന്നതിന്റെ ചെലവ് സര്‍ക്കാര്‍ ഏറ്റെടുക്കണമെന്നും കെ.സി വേണുഗോപാല്‍ പറഞ്ഞു. ദുരിതാശ്വാസ പ്രവര്‍ത്തനങ്ങളില്‍ രാഷ്ട്രീയം കലര്‍ത്താന്‍ കോണ്‍ഗ്രസും യു.ഡി.എഫുമില്ല. എന്നാല്‍ ക്യാംപുകളില്‍ ഏകപക്ഷീയമായ പ്രവര്‍ത്തനങ്ങളാണ് നടക്കുന്നത്. രാഷ്ട്രീയമായ ചേരിതിരിവിനെ കുറിച്ചും വിവേചനങ്ങളെ കുറിച്ചും വ്യാപക പരാതികളാണ് ക്യാമ്പുകളില്‍ നിന്നും വരുന്നത്. ജനപ്രതിനിധികളെ വിശ്വാസത്തിലെടുത്താണ് പുനരധിവാസ പ്രവര്‍ത്തനങ്ങള്‍ നടത്തേണ്ടത്. ജനപ്രതിനിധികളെ പൂര്‍ണമായും മാറ്റിനിര്‍ത്തിക്കൊണ്ടുള്ള പ്രവര്‍ത്തനമാണ് നടക്കുന്നതെന്നും അദ്ദേഹം കുറ്റപ്പെടുത്തി.
വിഷയം മുഖ്യമന്ത്രിയുടെ അടക്കം ശ്രദ്ധയില്‍ പെടുത്തിയിട്ടുണ്ടെങ്കിലും യാതൊരു നടപടിയുമുണ്ടായില്ല. ക്യാംപുകളില്‍ നിന്നും വീടുകളിലേക്ക് മടങ്ങുന്നവര്‍ക്ക് പ്രഖ്യാപിച്ച ധനസഹായത്തിലും അവ്യക്തത ഉണ്ട്. കുട്ടനാട്ടില്‍ നിന്നും പ്രളയം മൂലം ബന്ധുവീടുകളിലും മറ്റും അഭയം തേടിയവരടക്കം ദുരിതബാധിതരായ എല്ലാവര്‍ക്കും ധനസഹായം നല്‍കണമെന്നും എം.പി ആവശ്യപ്പെട്ടു.
കുട്ടനാട്ടിലെ കര്‍ഷകര്‍ക്ക് പുനര്‍വായ്പ എന്ന ആശയം ജനങ്ങളെ കൂടുതല്‍ കടത്തിലേക്ക് തള്ളിവിടും എന്നതിനാല്‍ കാര്‍ഷിക കടങ്ങള്‍ എഴുതിത്തള്ളാനുള്ള നടപടികള്‍ കേന്ദ്ര-സംസ്ഥാന സര്‍ക്കാരുകളും ബാങ്കുകളും സ്വീകരിക്കണം.
ദുരിതബാധിതരുടെ പുനരധിവാസവുമായി ബന്ധപ്പെട്ട് ജനപ്രതിനിധികളുടെ യോഗം വിളിക്കാന്‍ മുഖ്യമന്ത്രി ഇടപെടണമെന്നും അദ്ദേഹം പറഞ്ഞു. ഡിസിസി പ്രസിഡന്റ് എം. ലിജു, മുന്‍ എം.എല്‍.എ എ.എ ഷുക്കൂര്‍, കെ.പി.സി.സി സെക്രട്ടറി അഡ്വ. കെ.പി ശ്രീകുമാര്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.