കണ്ണൂര്‍: കണ്ണൂര്‍, കാസര്‍കോട് മണ്ഡലങ്ങളിലെ കനത്ത പോളിങിന്റെ വെളിച്ചത്തില്‍ പരാജയഭീതി പൂണ്ട സി.പി.എം ജില്ലയില്‍ വ്യാപകമായി അക്രമം അഴിച്ചുവിട്ടിരിക്കുകയാണെന്നു മുസ്‌ലിംലീഗ് ജില്ലാ ജനറല്‍സെക്രട്ടറി അബ്ദുല്‍കരീം ചേലേരി. സി.പി.എമ്മിന്റെ സഹജമായ കാടത്തം ഒന്നുകൂടി വ്യക്തമാക്കുന്നതാണ് അക്രമങ്ങളെന്നു കരീം ചേലേരി പറഞ്ഞു. പോളിങ് അവസാനിച്ചതിനുശേഷം സി.പി.എമ്മിന്റെ അക്രമത്തിന് ഇരകളായി വിവിധ ആശുപത്രികളില്‍ കഴിയുന്ന യു.ഡി.എഫ് പ്രവര്‍ത്തകരെയും ആക്രമണം നടന്ന പാര്‍ട്ടി ഓഫിസുകളും അദ്ദേഹം സന്ദര്‍ശിച്ചു. ജില്ലാ സെക്രട്ടറി കെ.ടി സഹദുല്ല, മണ്ഡലം നേതാക്കളായ ടി.എന്‍.എ ഖാദര്‍, എസ്.എ ശുക്കൂര്‍ ഹാജി തുടങ്ങിയവരും ഒപ്പമുണ്ടായിരുന്നു.