ന്യൂഡല്‍ഹി: കൊവിഡ് പശ്ചാത്തലത്തില്‍ വരാനിരിക്കുന്ന ബിഹാര്‍ അസംബ്ലി തെരഞ്ഞെടുപ്പ് നീട്ടിവയ്ക്കാന്‍ തെരഞ്ഞെടുപ്പ് കമ്മിഷന് നിര്‍ദ്ദേശം നല്‍കണമെന്നാവശ്യപ്പെട്ട ഹരജി സുപ്രിംകോടതി തള്ളി.
തെരഞ്ഞെടുപ്പ് നീട്ടിവയ്ക്കാന്‍ കൊവിഡ് മതിയായ കാരണമല്ലെന്ന് ചൂണ്ടിക്കാട്ടിയാണ് ജസ്റ്റിസുമാരായ അശോക് ഭൂഷണ്‍, ആര്‍ സുഭാഷ് റെഡ്ഡി, എം.ആര്‍ ഷാ എന്നിവരടങ്ങുന്ന ബെഞ്ച് ഹരജി തള്ളിയത്.
തെരഞ്ഞെടുപ്പ് ഇതുവരെ പ്രഖ്യാപിച്ചിട്ടില്ല. അതിനാല്‍ തെരഞ്ഞെടുപ്പ് നടക്കാന്‍ പോകുന്നത് കൊവിഡ് കാലത്താണെന്ന് വാദിക്കാന്‍ കഴിയില്ല. എന്ത് ചെയ്യണം, ചെയ്യരുത് എന്ന് തെരഞ്ഞെടുപ്പ് കമ്മിഷന് നിര്‍ദ്ദേശം നല്‍കാനും കോടതിക്ക് കഴിയില്ലെന്നും ബെഞ്ച് പറഞ്ഞു. എം.എല്‍.എമാര്‍ പോലും കൊവിഡ് ബാധിച്ച് മരിക്കുന്ന സാഹചര്യത്തില്‍ തെരഞ്ഞെടുപ്പ് നടത്തരുതെന്നും ഒഴിവാക്കാനാവാത്ത ഘട്ടത്തില്‍ തെരഞ്ഞെടുപ്പ് നീട്ടാമെന്ന് ചട്ടത്തിലുണ്ടെന്നും ചൂണ്ടിക്കാട്ടിയാണ് ഹരജി സമര്‍പ്പിച്ചത്. അഭിഭാഷകനായ രാജേഷ് ജയ്‌സ്‌വാളാണ് ഹരജിക്കാരന്‍.