ലോസ് ആഞ്ചലസ്: ബ്ലാക് പാന്തര്‍ സിനിമയിലെ നായകനെന്ന നിലയില്‍ പ്രശസ്തനായ ഹോളിവുഡ് നടന്‍ ചാഡ്‌വിക് ബോസ്മാന്‍ മരിച്ചു. 43കാരനായ അദ്ദേഹം വന്‍കുടലിന് അര്‍ബുദം ബാധിച്ച് നാലുവര്‍ഷമായി ചികില്‍സയിലായിരുന്നു.
2016ല്‍ ക്യാപ്റ്റന്‍ അമേരിക്ക: സിവില്‍ വാര്‍ എന്ന സിനിമയിലെ ബ്ലാക് പാന്തര്‍ എന്ന മാര്‍വെലിന്റെ സൂപ്പര്‍ ഹീറോ കഥാപാത്രം ചെയ്ത ഈ കറുത്തവര്‍ഗക്കാരന്‍ പിന്നീട് അവന്‍ജേഴ്‌സ്: ഇന്‍ഫിനിറ്റി വാര്‍, അവന്‍ജേഴ്‌സ്: എന്‍ഡ് ഗെയിം തുടങ്ങിയവയിലും മികച്ച പ്രകടനം കാഴ്ചവച്ചു. സ്‌പൈക് ലീയുടെ ദ 5 ബ്ലഡ്‌സാണ് അവസാന ചിത്രം. ഇത് ഈവര്‍ഷം നെറ്റ്ഫ്‌ളിക്‌സില്‍ റിലീസ് ചെയ്തിരുന്നു.
സൗത്ത് കരോലിനയിലെ ആന്‍ഡേഴ്‌സനില്‍ ജനിച്ചുവളര്‍ന്ന ബോസ്മാന്‍ 2003ലാണ് ആദ്യമായി അഭ്രപാളിയിലെത്തിയത്. ഓഗസ്റ്റ് 12ന് ട്വിറ്ററിലെ തന്റെ അവസാന പോസ്റ്റില്‍ കറുത്തവര്‍ഗക്കാരിയായ ഡമോക്രാറ്റിക് വൈസ് പ്രസിഡന്റ് സ്ഥാനാര്‍ഥി കമല ഹാരിസിനെ അഭിനന്ദിച്ചിരുന്നു.