തൃശൂര്‍: മണ്ണുത്തി ദേശീയപാതയില്‍ ഭിന്നശേഷിവിഭാഗത്തില്‍പ്പെട്ട യാത്രക്കാര്‍ക്ക് സൗകര്യപ്രദവും സൗഹൃദപരവുമായ സാഹചര്യം ഒരുക്കണമെന്ന പരാതിയില്‍ സംസ്ഥാന ന്യൂനപക്ഷ കമ്മിഷന്‍ വിശദീകരണം തേടി.
കലക്ടറേറ്റ് കോണ്‍ഫറന്‍സ് ഹാളില്‍ ന്യൂനപക്ഷ കമ്മിഷന്‍ അംഗം അഡ്വ. മുഹമ്മദ് ഫൈസലിന്റെ അധ്യക്ഷനായി നടന്ന സിറ്റിങ്ങിലാണ് പാലിയേക്കര ടോള്‍ പ്ലാസ അധികൃതര്‍, ദേശീയപാത വിഭാഗം, കൊരട്ടി സ്‌റ്റേഷന്‍ ഹൗസ് ഓഫിസര്‍ എന്നിവരോട് വിശദീകരണം തേടിയത്.
തൃശൂര്‍ സ്വദേശി ജോസ് പോളിന്റെ പരാതിയിലാണ് നടപടി. ആകെ 52 കേസുകളാണ് കമ്മിഷന്‍ മുന്‍പാകെ പരിഗണനയ്ക്ക് വന്നത്.
ഇതില്‍ ആറ് എണ്ണം തീര്‍പ്പാക്കി. പാലക്കാട്-തൃശൂര്‍ ജില്ലകളില്‍നിന്നുള്ള പരാതികളാണ് കമ്മിഷനു മുന്‍പാകെ വന്നത്. ഹല്‍വ നിര്‍മാണ കമ്പനിയില്‍നിന്നുള്ള മലിനീകരണം മൂലം വീടും പരിസരവും മലിനമാവുകയും ജീവിക്കാനാവുന്നില്ലെന്നുമുള്ള പരാതിയില്‍ കമ്മിഷന്റെ ഇടപെടലിനെ തുടര്‍ന്ന് പാലക്കാട് കാവശ്ശേരിയിലെ കമ്പനി അടച്ചുപൂട്ടാന്‍ സംസ്ഥാന മലിനീകരണ നിയന്ത്രണ ബോര്‍ഡ് ഉത്തരവിട്ടു.
നോണ്‍ക്രീമീലെയര്‍ സര്‍ട്ടിഫിക്കറ്റ് അനുവദിക്കാത്തതിനാല്‍ ജോലി പ്രവേശനം സാധ്യമായില്ല എന്ന പട്ടാമ്പി തൃത്താല സ്വദേശിനിയുടെ പരാതിയില്‍ പാലക്കാട് ജില്ലാ കലക്ടര്‍, പട്ടാമ്പി തഹസില്‍ദാര്‍ എന്നിവരില്‍നിന്ന് കമ്മിഷന്‍ റിപ്പോര്‍ട്ട് തേടി.
മെയ് 28നാണ് കമ്മിഷന്റെ അടുത്ത സിറ്റിങ്.