തൊടുപുഴ: പെട്ടിമുടി ദുരന്തത്തില്‍ പെട്ട ഒരാളുടെ മൃതദേഹം കൂടി കണ്ടെത്തി. എന്നാല്‍ മൃതദേഹം പുറത്തെടുക്കാനായില്ല. പ്രദേശവാസികളും വനംവകുപ്പും ചേര്‍ന്നുള്ള പരിശോധനയിലാണ് അപകട സ്ഥലത്ത് നിന്ന് 14 കിലോമീറ്റര്‍ മാറി ഭൂതക്കുഴിയില്‍ മൃതദേഹം കണ്ടെത്തിയത്. ആളെ തിരിച്ചറിഞ്ഞിട്ടില്ല. ഇതോടെ പെട്ടിമുടി അപകടത്തില്‍ മരണം 66 ആയി.പുഴയില്‍ പാറക്കൂട്ടത്തിനുള്ളില്‍ കുടുങ്ങിയ നിലയിലാണ് മൃതദേഹം. ഇത് പുറത്തെടുക്കുന്നതിന് അഗ്‌നിരക്ഷാ സേന സ്ഥലത്തെത്തിയെങ്കിലും വെളിച്ചക്കുറവുള്ളതിനാല്‍ ശ്രമം ഇന്നത്തേക്ക് മാറ്റി. പെട്ടിമുടില്‍ വച്ച് തന്നെ ഇന്‍ക്വസ്റ്റ് പൂര്‍ത്തിയാക്കി പോസ്റ്റ്‌മോര്‍ട്ടം നടത്തുമെന്ന് ജില്ലാ ഭരണകൂടം അറിയിച്ചു.
70 പേരാണ് പെട്ടിമുടി ദുരന്തത്തില്‍ അകപ്പെട്ടത്. ഇതില്‍ 65 പേരുടെ മൃതദേഹം ഇതുവരെ കണ്ടെത്തി സംസ്‌കരിച്ചു. ഓഗസ്റ്റ് ആറിന് രാത്രി 11 മണിയോടെയായിരുന്നു കേരളത്തിലെ ഏറ്റവും വലിയ ഉരുള്‍പൊട്ടല്‍ ദുരന്തം മൂന്നാര്‍ പെട്ടിമുടിയില്‍ ഉണ്ടായത്.