പെരിന്തല്‍മണ്ണ: അലിഗഢ് മുസ്‌ലിം യൂനിവേഴ്‌സിറ്റി മലപ്പുറം കേന്ദ്രത്തിന്റെ പുതിയ ഡയരക്ടറായി ഡോ. കെ.പി.ഫൈസല്‍ ഹുദവി ചുമതലയേറ്റു. അലിഗഢ് മലപ്പുറം കേന്ദ്രത്തിന്റെ തുടക്കം മുതല്‍ അധ്യാപകനായും 2015 മുതല്‍ നിയമവിഭാഗം മേധാവിയായും സേവനമനുഷ്ഠിച്ച് വരികയായിരുന്നു. ഡല്‍ഹി യൂനിവേഴ്‌സിറ്റിക്ക് കീഴിലുള്ള ഡല്‍ഹി സ്‌കൂള്‍ ഓഫ് ഇക്കണോമിക്‌സ്, ജാമിഅഃ മില്ലിയ ഇസ്‌ലാമിയ ന്യൂഡല്‍ഹി, ജാമിഅഃ ഹംദര്‍ദ്, അലിഗഢ് മുസ്‌ലിം യൂനിവേഴ്‌സിറ്റി തുടങ്ങിയ സ്ഥാപനങ്ങളില്‍ അധ്യാപകനായും അലിഗഢ് മുസ്‌ലിം യൂനിവേഴ്‌സിറ്റിയുടെ ഉന്നതാധികാര സമിതിയായ അലിഗഢ് കോര്‍ട്ടറില്‍ മെംബറായും സേവനം അനുഷ്ഠിച്ചിട്ടുണ്ട്.
ചെമ്മാട് ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റിയില്‍ നിന്ന് പഠനം പൂര്‍ത്തിയാക്കിയതിന് ശേഷം കാലിക്കറ്റ് യൂനിവേഴ്‌സിറ്റിയില്‍ നിന്ന് സോഷ്യോളജിയില്‍ പി.ജി. കരസ്ഥമാക്കിയ ഇദ്ദേഹം ജെ.എന്‍.യു.വില്‍ നിന്ന് 2005ല്‍ എം.ഫിലും 2010ല്‍ പി.എച്ച്.ഡിയും നേടിയിട്ടുണ്ട്. മലപ്പുറം ജില്ലയിലെ മാരിയാട് സ്വദേശിയാണ്.