മലപ്പുറം: ഓണക്കാലത്ത് വിഷവിമുക്ത പച്ചക്കറികളുടെയും പഴവര്‍ഗങ്ങളുടെയും ലഭ്യത ഉറപ്പുവരുത്തുന്നതിനായി ജില്ലാ തലങ്ങളില്‍ പ്രത്യേക സ്‌ക്വാഡുകള്‍ രൂപീകരിച്ച് പരിശോധന നടത്തും.  പച്ചക്കറി ഉല്‍പ്പാദന, മൊത്തവിതരണ കേന്ദ്രങ്ങളിലാണ് പരിശോധന ശക്തമാക്കുന്നത്.

ഇവിടങ്ങളില്‍നിന്ന് സാമ്പിളുകള്‍ ശേഖരിച്ച് സര്‍ക്കാര്‍ അനലിറ്റിക്കല്‍ ലബോറട്ടറികളിലും  കാര്‍ഷിക സര്‍വകലാശാലയുടെ ലാബിലും പരിശോധിക്കും. ഓണവിപണിയിലെ പരിശോധന ഓഗസ്റ്റ് 15ന് ആരംഭിച്ച്  ഓണവിപണികള്‍ അവസാനിക്കുന്നതുവരെ നിശ്ചിത ഇടവേളകളില്‍ തുടരണമെന്നാണ് ഭക്ഷ്യസുരക്ഷാ കമ്മിഷണറുടെ ഉത്തരവ്. അയല്‍സംസ്ഥാനങ്ങളില്‍ നിന്നാണ് ഓണക്കാലത്ത് കേരളത്തിലേക്ക് കൂടുതല്‍ പച്ചക്കറികളെത്തുന്നത്.

 ഇവയില്‍  വെണ്ടക്ക, വഴുതന, കാരറ്റ്, കോളിഫ്‌ളവര്‍, മല്ലിയില, കറിവേപ്പില തുടങ്ങിയവയില്‍  വിഷാംശം കൂടുലുള്ളതെന്നാണ് റിപ്പോര്‍ട്ട്. തമിഴ്‌നാട്ടിലും കര്‍ണാടകയിലും  യാതൊരു നിയന്ത്രണവുമില്ലാതെയാണ് കര്‍ഷകര്‍ കീടനാശിനി ഉപയോഗിക്കുന്നത്. കീടങ്ങളെ തുരത്താന്‍ വിളകളില്‍  രണ്ടും മൂന്നും തവണ അവര്‍ കീടനാശിനി തളിക്കുന്നുണ്ട്.

അതേസമയം, കൃഷിവകുപ്പിന്റെ നേതൃത്വത്തില്‍ ഈ ഓണക്കാലത്ത് 85,000 ടണ്‍ വിഷരഹിത പച്ചക്കറി വിപണിയിലെത്തിക്കുമെന്നും ഇതിനായി 15,000 ഹെക്ടര്‍ സ്ഥലത്ത് ഓണസമൃദ്ധി പദ്ധതിയില്‍ പച്ചക്കറി കൃഷി നടത്തുമെന്നും കൃഷി മന്ത്രി വി.എസ് സുനില്‍കുമാര്‍ പ്രഖ്യാപിച്ചിരുന്നു.