അങ്ങാടിപ്പുറം: നെറ്റ്‌ബോള്‍ അസോസിയേഷന്റെ നേതൃത്വത്തില്‍ പരിയാപുരം സെന്റ് മേരീസ് ഹയര്‍ സെക്കന്‍ഡറി സ്‌കൂള്‍ മൈതാനത്തു നടന്ന ജില്ലാ നെറ്റ്‌ബോള്‍ ചാംപ്യന്‍ഷിപ്പില്‍ പരിയാപുരത്തിന് ഓവറോള്‍ കിരീടം. ജൂനിയര്‍ (ആണ്‍) വിഭാഗത്തില്‍ പരിയാപുരം മരിയന്‍ സ്‌പോര്‍ട്‌സ് അക്കാദമി 14-7ന് ചുങ്കത്തറ മാര്‍ത്തോമ ഹയര്‍ സെക്കന്‍ഡറി സ്‌കൂളിനെ തകര്‍ത്ത് ചാംപ്യന്‍മാരായി.
ജൂനിയര്‍ (പെണ്‍) വിഭാഗത്തിലും മരിയന്‍ സ്‌പോര്‍ട്‌സ് അക്കാദമി കിരീടം ചൂടി. പരിയാപുരം സെന്റ് മേരീസ് ഹയര്‍ സെക്കന്‍ഡറി സ്‌കൂളിനെ 9-1ന് ഫൈനലില്‍ തോല്‍പ്പിച്ചു. സബ് ജൂനിയര്‍ ആണ്‍കുട്ടികളുടെ വിഭാഗത്തില്‍ സെന്റ് മേരീസ് ഹയര്‍ സെക്കന്‍ഡറി സ്‌കൂളും പെണ്‍കുട്ടികളുടെ വിഭാഗത്തില്‍ മരിയന്‍ സ്‌പോര്‍ട്‌സ് അക്കാദമിയും ജേതാക്കളായി.
മരിയന്‍ അക്കാദമിയും(ആണ്‍) സെന്റ് മേരീസും(പെണ്‍) റണ്ണേഴ്‌സ് അപ്പായി. മിനി(ആണ്‍) കിരീടം പരിയാപുരം ഫാത്തിമ യു.പി സ്‌കൂളിനെ ഫൈനലില്‍ തോല്‍പ്പിച്ച് ചുങ്കത്തറ മാര്‍ത്തോമ സ്വന്തമാക്കി. മിനി(പെണ്‍) വിഭാഗത്തില്‍ ചുങ്കത്തറ മാര്‍ത്തോമയെ കീഴടക്കി പരിയാപുരം ഫാത്തിമ യു.പി സ്‌കൂള്‍ ചാംപ്യന്‍മാരായി. സമാപനസമ്മേളനത്തില്‍ ബ്ലോക്ക്പഞ്ചായത്ത് സ്ഥിരംസമിതി അധ്യക്ഷന്‍ അമീര്‍ പാതാരിയും പഞ്ചായത്ത് സ്ഥിരംസമിതി അധ്യക്ഷ ഏലിയാമ്മ തോമസും വിജയികള്‍ക്ക് ട്രോഫികള്‍ സമ്മാനിച്ചു.
അസോസിയേഷന്‍ ജില്ലാ സെക്രട്ടറി ജലാല്‍ താപ്പി ആധ്യക്ഷനായി.
കെ.എസ് സിബി, പി.കെ രാജേഷ്, ടി.വി രാഹുല്‍, ജസ്റ്റിന്‍ ജോസ്, സജി പുതുപ്പറമ്പില്‍, ശരത് ശിവകുമാര്‍, മെബ്‌റൂക്ക് അബ്ദുല്‍ ഖാദര്‍, പി.ശിഹാബുദ്ദീന്‍ സംസാരിച്ചു.