നെയ്യാറ്റിന്‍കര: മാരായമുട്ടം ഹയര്‍ സെക്കന്‍ഡറി സ്‌കൂള്‍ കേന്ദ്രീകരിച്ച് കഞ്ചാവ് വില്‍പ്പന നടത്തിയ രണ്ട് യുവാക്കളെ മാരായമുട്ടം പൊലിസ് അറസ്റ്റ് ചെയ്തു. വെങ്ങാനൂര്‍ വില്ലേജില്‍ കട്ടച്ചല്‍കുഴി നെല്ലിവിള വീട്ടില്‍ ആശോകന്റെ മകന്‍ അനന്തു (19), വെങ്ങാനൂര്‍ വില്ലേജില്‍ കട്ടച്ചല്‍കുഴി നെടിയവിള വീട്ടില്‍ ശശിധരന്റെ മകന്‍ വിഷ്ണു (18) എന്നിവരാണ് പിടിയിലായത്.
ഇന്നലെ രാവിലെ 10.15 ഓടു കൂടി മാരായമുട്ടം എസ്.ഐയ്ക്ക് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് കഞ്ചാവുമായി രണ്ട് യുവാക്കളും പിടിയിലായത്. കഞ്ചാവ് വില്‍പ്പനയ്ക്കായി ഇവര്‍ ഉപയോഗിച്ച ബൈക്കും പൊലിസ് പിടിച്ചെടുത്തു. ഇവരില്‍ നിന്ന് 5 ഗ്രാം വീതമുള്ള രണ്ട് പൊതികള്‍ വീതം കണ്ടെടുത്തു. കൂടാതെ ബൈക്കിന്റെ സീറ്റിനടിയില്‍ ഒളിപ്പിച്ച നിലയില്‍ 70 ഗ്രാമുള്ള മറ്റൊരു പൊതിയും കണ്ടെടുത്തു.
കഞ്ചാവ് വിറ്റ ഇനത്തില്‍ ലഭിച്ച 600 രൂപയും പ്രതികളില്‍ നിന്നും പിടിച്ചെടുത്തു. ഇവര്‍ സ്ഥിരം സ്‌കൂള്‍ കേന്ദ്രീകരിച്ച് ചുറ്റി നടക്കുന്നതായി നാട്ടുകാര്‍ പൊലിസിന് മൊഴി നല്‍കി. ഇന്നലെ കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.