കളമശേരി:നോര്‍ത്ത് കളമശേരി അപ്പോളോ ടയേഴ്‌സിന് സമീപം വാഹനാപകടത്തില്‍ പെട്ട് ബൈക്ക് യാത്രക്കാരന്‍ മരിച്ചു. ആലപ്പുഴ സ്വദേശി പോത്തന്‍ പറമ്പില്‍ കബീര്‍ (41) ആണ് മരിച്ചത്.
ബുധനാഴ്ച രാവിലെ പത്തോടെയാണ് അപകടം. കളമശേരിയില്‍ നിന്നും ആലുവ ഭാഗത്തേക്ക് വരികയായിരുന്നു കബീര്‍. റോഡരികില്‍ നിറുത്തിയ കാറിന്റെ ഡോര്‍ പെട്ടെന്ന് തുറന്നത് മൂലം ബൈക്കില്‍ തട്ടി റോഡിലേക്ക് തെറിച്ച് വീണ കബീറിന്റെ ദേഹത്ത് കൂടെ കെ.എസ്.ആര്‍.ടി.സി ബസ് കയറി ഇറങ്ങുകയായിരുന്നു. തല്‍ക്ഷണം മരണം സംഭവിച്ചു.
മൃതദേഹം എറണാകുളം ഗവ.മെഡിക്കല്‍ കോളജ് മോര്‍ച്ചറിയില്‍ സൂക്ഷിച്ചിരിക്കുകയാണ്. മുപ്പത്തടത്ത് വാടകക്ക് താമസിക്കുകയായിരുന്ന കബീര്‍ ഈ അടുത്ത കാലത്ത് കങ്ങരപ്പടിയിലേക്ക് താമസം മാറിയിരുന്നു. ഗള്‍ഫിലായിരുന്ന കബീര്‍ നാട്ടില്‍ വന്നിട്ട് അധിക നാളായില്ല. ഭാര്യ സോനു.