കരുനാഗപള്ളി സ്വദേശിക്കെതിരേ നടപടിക്ക് ശുപാര്‍ശ

മുഹമ്മ (ആലപ്പുഴ): സിവില്‍ പൊലിസ് ഓഫിസര്‍ തസ്തികയിലേയ്ക്ക് പി.എസ്.സി നടത്തിയ കായികക്ഷമതാ പരീക്ഷയില്‍ ആള്‍മാറാട്ടം. ചാരമംഗലം ഡി.വി.എച്ച്.എസ്.എസില്‍ ഇന്നലെ നടന്ന കായികക്ഷമതാ പരീക്ഷയിലാണ് സംഭവം. കരുനാഗപള്ളി സ്വദേശി ശരത്തിനെതിരേ നടപടി എടുക്കാന്‍ പി.എസ്.സി ആലപ്പുഴ ജില്ലാ ഓഫിസ്, സംസ്ഥാന പി.എസ്.സി പരീക്ഷാ കമ്മിഷനര്‍ക്ക് റിപ്പോര്‍ട്ട് നല്‍കി.

രാവിലെ ഒന്‍പതോടെയായിരുന്നു സംഭവം. രേഖകളുടെ പരിശോധന നടന്ന ശേഷം ആദ്യം 100 മീറ്റര്‍ ഓട്ടത്തിന് ശരത്തിന് പകരം മറ്റൊരാളാണ് ഓടി വിജയിച്ചത്. പിന്നീട് ഇയാള്‍ ഹൈജംപിന് തയാറായി നില്‍ക്കവേ ഗ്രൗണ്ടിലുണ്ടായിരുന്ന പി.എസ്.സി ജീവനക്കാരിക്ക് സംശയം തോന്നി തിരിച്ചറിയല്‍ കാര്‍ഡിലെ ഫോട്ടോ പരിശോധിക്കാന്‍ ഉദ്യോഗാര്‍ഥിയെ വിളിച്ചു. ഈ സമയം ഇയാള്‍ സ്‌കൂളിന്റെ മതില്‍ ചാടി രക്ഷപ്പെടുകയായിരുന്നു.
ശരത്തിന്റെ അറിവോടെയാണ് ആള്‍മാറാട്ടം നടന്നതെന്ന് പൊലിസ് വ്യക്തമാക്കി. ഇതിന്റെ അടിസ്ഥാനത്തിലാണ് നടപടിയെടുക്കാന്‍ പി.എസ്.സി ജില്ലാ ഓഫിസ് പരീക്ഷാ കമ്മിഷനര്‍ക്ക് റിപ്പോര്‍ട്ട് നല്‍കിയത്.