കാസര്‍കോട്: ജലക്ഷാമം വര്‍ധിക്കുന്നതിനെ തുടര്‍ന്ന് ജില്ലയിലെ 32 പഞ്ചായത്തുകളിലും മൂന്നു നഗരസഭകളിലും ജലവിതരണം തുടങ്ങിയതായി അധികൃതര്‍ വ്യക്തമാക്കി. ജലം കിട്ടാതെ വരുകയാണെങ്കില്‍ അതാത് പരിധിയിലെ പഞ്ചായത്ത് മുനിസിപ്പാലിറ്റികളില്‍ ബന്ധപ്പെടണമെന്നും അധികൃതര്‍ വ്യക്തമാക്കിയിട്ടുണ്ട്.
ജില്ലയിലെ ഏഴു പഞ്ചായത്തുകളിലാണ് ഇനി ജലവിതരണം തുടങ്ങാനുള്ളതെന്നും ഇവിടങ്ങളിലും അടുത്ത ദിവസങ്ങളില്‍ തന്നെ ജലവിതരണം തുടങ്ങുമെന്നും അധികൃതര്‍ വ്യക്തമാക്കി. അതേസമയം ജലവിതരണത്തിനും മറ്റും നടപടികള്‍ സ്വീകരിക്കാന്‍ ബന്ധപ്പെട്ട തദ്ദേശ സ്വയംഭരണ സ്ഥാപനങ്ങള്‍ക്ക് സര്‍ക്കാര്‍ നേരിട്ട് അനുവാദം നല്‍കിയതായി കലക്ടറേറ്റിലെ ഉദ്യോഗസ്ഥര്‍ വ്യക്തമാക്കി.
ഇക്കാര്യത്തില്‍ ബന്ധപ്പെട്ട പഞ്ചായത്തുകളാണ് അടിയന്തിരമായി നടപടികള്‍ കൈക്കൊള്ളേണ്ടതെന്നും കഴിഞ്ഞ ദിവസം നടത്തിയ അവലോകന യോഗത്തില്‍ നിലവില്‍ 32 പഞ്ചായത്തുകളും മൂന്നു നഗരസഭകളും തങ്ങളുടെ പരിധിയിലുള്ള വരള്‍ച്ചാ ബാധിത പ്രദേശങ്ങളില്‍ ജലമെത്തിക്കുന്നതായും ഉദ്യോഗസ്ഥര്‍ പറഞ്ഞു.