വടകര: ലോക്‌സഭാ തെരഞ്ഞെടുപ്പ് അട്ടിമറിക്കാന്‍ സി.പി.എം സംസ്ഥാന നേതൃത്വം നേരിട്ട് ഇടപെട്ടതായി ആര്‍.എം.പി.ഐ സംസ്ഥാന സെക്രട്ടറി എന്‍. വേണു.
പരാജയം മുന്നില്‍ക്കണ്ടാണ് ഇത്തരത്തില്‍ പദ്ധതി തയാറാക്കിയത്. ഇതിന്റെ ഭാഗമായാണ് വന്‍തോതില്‍ കള്ളവോട്ട് ചെയ്യാന്‍ പാര്‍ട്ടി തീരുമാനിച്ചത്. തെരഞ്ഞെടുപ്പ് ഉദ്യോഗസ്ഥര്‍, ബി.എല്‍.ഒമാര്‍, പാര്‍ട്ടി നേതാക്കള്‍ എന്നിവര്‍ ചേര്‍ന്ന അച്ചുതണ്ടാണ് ഇത് സാധ്യമാക്കാന്‍ മുന്നിട്ടിറങ്ങിയത്. എതിരാളികളുടെ വോട്ടുകള്‍ നീക്കംചെയ്യുകയും പാര്‍ട്ടിക്കാര്‍ക്ക് ഇരട്ട വോട്ട് നല്‍കുകയും ചെയ്താണ് ബി.എല്‍.ഒമാര്‍ ഇക്കാര്യം നടത്തിയത്. തെരഞ്ഞെടുപ്പ് ദിനത്തില്‍ പാര്‍ട്ടിയുടെ ശക്തികേന്ദ്രങ്ങളില്‍ ബൂത്ത് പിടിച്ചെടുക്കാന്‍ ശ്രമം നടന്നു. അണികളുടെ വോട്ട് എതിരാളികള്‍ക്ക് പോകുമെന്ന ഭയംകൊണ്ട് പരമാവധി ഓപ്പണ്‍വോട്ടുകള്‍ ചെയ്യാന്‍ നേതൃത്വം നിര്‍ദേശം നല്‍കിയിരുന്നു.
ഓരോ ബൂത്തിലും 25 വീതം ഓപ്പണ്‍വോട്ടുകള്‍ ചെയ്യണമെന്നായിരുന്നു നിര്‍ദേശം. തെരഞ്ഞെടുപ്പ് അട്ടിമറിക്കാന്‍ കൂട്ടുനിന്ന ഉദ്യോഗസ്ഥര്‍ക്കെതിരേ കേന്ദ്ര തെരഞ്ഞെടുപ്പ് കമ്മിഷന് ആര്‍.എം.പി.ഐ പരാതി നല്‍കും. വടകര പാര്‍ലമെന്റ് മണ്ഡലത്തിലെ കൂത്തുപറമ്പ്, തലശേരി, കുറ്റ്യാടി അസംബ്ലി മണ്ഡലങ്ങളിലെ ചില ബൂത്തുകള്‍, നാദാപുരം അസംബ്ലി മണ്ഡലത്തിലെ ചില ബൂത്തുകള്‍ എന്നിവിടങ്ങളില്‍ വ്യാപകമായി കള്ളവോട്ട് ചെയ്തിട്ടുണ്ട്. ഇതും പരാതിയില്‍ ഉള്‍പ്പെടുത്തും. സ്വതന്ത്രവും നീതിപൂര്‍വവുമായ തെരഞ്ഞെടുപ്പ് നടത്താന്‍ വോട്ടിങ്ങ് ചട്ടങ്ങളില്‍ മാറ്റം അനിവാര്യമാണെന്നും അദ്ദേഹം പറഞ്ഞു.