മട്ടന്നൂര്‍ : കഴിഞ്ഞ ദിവസം കെ.എസ്.യു കോളജ് യൂനിറ്റു സെക്രട്ടറി മുസമ്മിലിനു മര്‍ദ്ദനമേറ്റതിനു പിന്നാലെ ഇന്നലെ കെ.എസ്.യു ബ്ലോക്ക് പ്രസിഡന്റിനു നേരെയും  അക്രമം. കെ.എസ്.യു മട്ടന്നൂര്‍ ബ്ലോക്ക് പ്രസിഡണ്ട് ആദര്‍ശ് മാങ്ങാട്ടിടത്തിനു നേരെയാണ് എസ്.എഫ്.ഐ പ്രവര്‍ത്തകരെന്ന് ആരോപിക്കുന്ന സംഘം അക്രമം നടത്തിയത്. എസ്.എഫ്.ഐ പ്രവര്‍ത്തകര്‍ക്കെതിരെ പരാതി നല്‍കിയതിന് പിന്നാലെ  ബൈക്കില്‍ വന്ന ആറംഗസംഘം എളമ്പാറയില്‍ വച്ച്  മര്‍ദിച്ചുവെന്നാണ് പരാതി.
അക്രമത്തില്‍ സാരമായി പരുക്കേറ്റ ആദര്‍ശിനെ തലശേരി ഇന്ദിരാഗാന്ധി ആസ്പത്രിയില്‍ പ്രവേശിപ്പിച്ചു. ആദര്‍ശ് മാങ്ങാട്ടിടത്തിനു നേരെ എസ്.എഫ്.ഐ നടത്തിയ അക്രമത്തില്‍ പ്രതിഷേധിച്ചു മട്ടന്നൂര്‍ നിയോജകമണ്ഡലത്തിലെ  പാരലല്‍ കോളേജ് ഉള്‍പ്പെടെയുള്ള മുഴുവന്‍  വിദ്യാഭാസ സ്ഥാപനങ്ങളിലും കെ.എസ്.യു പഠിപ്പുമുടക്കുമെന്നു ജില്ലാ പ്രസിഡന്റ് സുദീപ് ജെയിംസ് അറിയിച്ചു.