മൊഹാലി: ഇന്ത്യയുടെ വെടിക്കെട്ട് ബാറ്റ്‌സ്മാന്‍ യുവരാജ് സിങ് ക്രിക്കറ്റിലേക്ക് തിരിച്ചെത്തുന്നു. നേരത്തേ വിരമിക്കല്‍ പ്രഖ്യാപിച്ച താരം പഞ്ചാബിനുവേണ്ടി ആഭ്യന്തര ക്രിക്കറ്റ് കളിക്കാന്‍ തയാറാണെന്നറിയിച്ച് ബി.സി.സി.ഐക്ക് കത്തെഴുതുകയും ചെയ്തു. 2019 ജൂണിലാണ് ക്രിക്കറ്റിന്റെ എല്ലാ ഫോര്‍മാറ്റില്‍ നിന്നും താരം വിരമിക്കല്‍ പ്രഖ്യാപിച്ചത്. അന്നു മുതല്‍ ചില ടി20, ടി10 മത്സരങ്ങളില്‍ ഇറങ്ങുകയും ചെയ്തു.
കഴിഞ്ഞ കുറച്ച് മാസങ്ങളായി പഞ്ചാബ് ക്രിക്കറ്റ് അസോസിയേഷന്റെ അഭ്യര്‍ഥന പ്രകാരം താരം ശുഭ്മാന്‍ ഗില്‍, അഭിഷേക് ശര്‍മ, പ്രഭ്‌സിംറാന്‍ സിങ്, അന്‍മോല്‍പ്രീത് സിങ് എന്നിവരോടൊപ്പം മെഹാലിയില്‍ നെറ്റസില്‍ പരിശീലനം നടത്തിയിരുന്നു. പരിശീലനത്തിന് ശേഷം പഞ്ചാബ് ക്രിക്കറ്റ് അസോസിയേഷന്‍ സെക്രട്ടറിയായ പുനീത് ബാലി യുവരാജിനെ സമീപിക്കുകയും വിരമിക്കല്‍ തീരുമാനം പിന്‍വലിച്ച് പഞ്ചാബിനുവേണ്ടി കളിക്കാന്‍ താല്‍പ്പര്യം അറിയിക്കുകയും ചെയ്തു. തിരിച്ചുവരവ് തീരുമാനം എളുപ്പമല്ലെങ്കിലും പഞ്ചാബിനെ ആഭ്യന്തര മത്സരങ്ങളില്‍ നേട്ടങ്ങളിലേക്ക് എത്തിക്കാനായാണ് ഇത്തരമൊരു തീരുമാനം എടുത്തതെന്നും യുവരാജ് പറഞ്ഞു.
2007ല്‍ ഇന്ത്യ ടി20 ലോകകപ്പ് നേടിയപ്പോഴും 2011ല്‍ ഏകദിന ലോകകപ്പ് നേടിയപ്പോഴും യുവരാജ് സിങ്ങിന്റെ പ്രകടനം നിര്‍ണ്ണായകമായിരുന്നു. 2011 ഏകദിന ലോകകപ്പില്‍ യുവരാജായിരുന്നു ടൂര്‍ണമെന്റിലെ താരം.