വടകര: വെള്ളപ്പൊക്കത്തില്‍ ഒഴുകിയെത്തിയ ആഫ്രിക്കന്‍പായല്‍ കര്‍ഷകര്‍ക്ക് ദുരിതമാകുന്നു.
ആയഞ്ചേരി, തിരുവള്ളൂര്‍ പഞ്ചായത്തുകളിലെ ഏക്കര്‍കണക്കിന് വയലുകളിലാണ് ആഫ്രിക്കന്‍ പായല്‍ ഒലിച്ചെത്തിയത്.
അടുത്ത മാസം നെല്‍കൃഷിയിറക്കേണ്ട കര്‍ഷകര്‍ക്ക് പായല്‍ ശല്യം തിരിച്ചടിയായി. അടുത്ത കാലത്തൊന്നും കണ്ടിട്ടില്ലാത്ത വെള്ളപ്പൊക്കമാണ് ഇവിടങ്ങളില്‍ അനുഭവപ്പെട്ടത്. പല ഭാഗങ്ങളിലുമുള്ള പായലുകള്‍ വയലുകളിലേക്ക് ഒഴുകിയെത്തുകയായിരുന്നു.
ആയഞ്ചേരി, തറോപ്പൊയില്‍, തിരുവള്ളൂര്‍, വെള്ളൂക്കര, കന്നിനട ഭാഗങ്ങളിലാണ് പായല്‍ ധാരാളമുള്ളത്. ഇനി കൃഷിയിറക്കണമെങ്കില്‍ പായല്‍ നീക്കേണ്ടതുണ്ട്. കൃഷി നഷ്ടത്തിലായ കര്‍ഷകര്‍ക്ക് പായല്‍ നീക്കുന്നത് അധിക സാമ്പത്തിക ബാധ്യത ഉണ്ടാക്കും.
അട്ട ശല്യവും നീര്‍ക്കെട്ടും കാരണം പല കൃഷിയിടങ്ങളും നെല്‍കൃഷി ഇറക്കാതെ ഒഴിച്ചിട്ടിരിക്കുകയാണ്. സാധാരണ കൃഷി ചെയ്യുന്ന വയലുകളില്‍ പായല്‍ കൂടിയായതോടെ കര്‍ഷകര്‍ ശരിക്കും ബുദ്ധിമുട്ടിലായി.