താമരശ്ശേരി: മഴ തകര്‍ത്തു പെയ്ത ഓഗസ്റ്റ് 16ന് രാവിലെ റേഷന്‍ കാര്‍ഡും മണ്ണെണ്ണ കുപ്പിയും സഞ്ചിയുമെടുത്ത് റേഷന്‍ കടയിലേക്കിറങ്ങിയതായിരുന്നു തിരുവമ്പാടി കറ്റിയാട്ട് കുരീക്കാട്ടില്‍ ജോമിഷ്.
കടയിലേക്ക് പോകുന്ന വഴിക്കാണ് കനത്ത മഴയില്‍ തന്റെ കൂട്ടുകാരന്‍ രാജേഷിന്റെ വീട്ടില്‍ വെള്ളം കയറിയത് ജോമിഷ് അറിയുന്നത്. കടയിലേക്ക് പോകുന്നത് മാറ്റിവച്ച് റേഷന്‍ കാര്‍ഡും മണ്ണെണ്ണ കുപ്പിയും സഞ്ചിയുമായി ഉടന്‍ സുഹൃത്ത് രാജേഷിന്റെ വീട്ടിലെത്തി രക്ഷാപ്രവര്‍ത്തനത്തില്‍ ഏര്‍പ്പെട്ടു. ഇതിനിടെ തന്റെ കൈയിലുണ്ടായിരുന്ന റേഷന്‍ കാര്‍ഡ് നഷ്ടപ്പെട്ടത് ജോമിഷ് അറിയുന്നത് പിന്നീടാണ്.
താലൂക്കുതല അദാലത്തിലേക്കായി അപേക്ഷകള്‍ അര്‍പ്പിച്ച് ജോമിഷ് കാത്തിരുന്നു. ഇന്നലെ നടന്ന അദാലത്തില്‍ മിനിട്ടുകള്‍ക്കകം റേഷന്‍ കാര്‍ഡ് റെഡി .കൂലിത്തൊഴില്‍ എടുത്ത് ജീവിക്കുന്ന ജോമിഷിനും കുടുംബത്തിനും തെല്ലൊന്നുമല്ല ഈ അദാലത്ത് ആശ്വാസമായത്.