കുറ്റ്യാടി: കലുഷിതമായ സാമൂഹ്യ വ്യവസ്ഥയില്‍ യഥാര്‍ഥ ജീവിതാവബോധം ഉണര്‍ത്തുന്നതാണ് കെ.ടി സൂപ്പിയുടെ കവിതകളെന്ന് പ്രമുഖ നോവലിസ്റ്റും പ്രഭാഷകനുമായ കെ.പി രാമനുണ്ണി. കവിയും പരിഭാഷകനുമായ എഴുത്തുകാരന്‍ കെ.ടി സൂപ്പിയുടെ പുതിയ ഹൈക്കു കവിത സമാഹാരമായ 'വിത്തിനും പൂവിനുമിടയില്‍' പുസ്തകം പ്രകാശനം ചെയ്തു സംസാരിക്കുകയായിരുന്നു അദ്ദേഹം. കുറ്റ്യാടി എം.ഐ.യു.പി സ്‌കൂളില്‍ നടന്ന ചടങ്ങില്‍ കവി പി.കെ ഗോപി അധ്യക്ഷനായി. കഥാകൃത്ത് പി.കെ പാറക്കടവ് പുസ്തകം ഏറ്റുവാങ്ങി. എം.പി അനസ് പുസ്തക അവലോകനം നടത്തി. ജയചന്ദ്രന്‍ മൊകേരി, സി.കെ കരുണാകരന്‍, വി.സി ഇഖ്ബാല്‍, മൊയ്തു കണ്ണങ്കോടന്‍, പി.കെ നവാസ്, ഒ. ബാബു, ബാലന്‍ തളിയില്‍, പി. ജമാല്‍, അബ്ദുല്ല സല്‍മാന്‍, അഡ്വ. ജമാല്‍ പാറക്കല്‍ സംസാരിച്ചു. കെ.ടി സൂപ്പി മറുപടി പ്രസംഗം നടത്തി.