തിരുവനന്തപുരം: തലസ്ഥാനത്ത് ജില്ലാ ജഡ്ജിയുടെ അധ്യക്ഷതയില്‍ മാധ്യമപ്രവര്‍ത്തകരെയും അഭിഭാഷകരെയും ഉള്‍പെടുത്തി സ്ഥിരംസമിതി രൂപീകരിക്കും. വഞ്ചിയൂര്‍ കോടതിയില്‍ വ്യാഴാഴ്ചയുണ്ടായ സംഘര്‍ഷത്തിന്റെ പശ്ചാത്തലത്തില്‍ ഹൈക്കോടതി ജഡ്ജിമാരുടെ ഇടപെടലിനെ തുടര്‍ന്നാണ് തീരുമാനം. മറ്റുജില്ലകളിലും ഇത്തരം സമിതികള്‍ക്ക് രൂപംനല്‍കുന്നതിന് യോഗത്തില്‍ ധാരണയായിട്ടുണ്ട്.

വഞ്ചിയൂര്‍  കോടതിയിലെ സംഘര്‍ഷത്തിന്റെ പശ്ചാത്തലത്തില്‍ സംഭവം അന്വേഷിക്കാനാണ് സുപ്രിംകോടതിയുടെ നിര്‍ദേശപ്രകാരം ഹൈക്കോടതിയിലെ മുതിര്‍ന്ന ജഡ്ജിമാരായ പി.എന്‍ രവീന്ദ്രനും പി.കെ രാമചന്ദ്രമേനോനും ഇന്നലെ തലസ്ഥാനത്തെത്തിയത്. അക്രമത്തെത്തുടര്‍ന്ന് നിലനില്‍ക്കുന്ന സംഘര്‍ഷാവസ്ഥ ലഘൂകരിക്കാനായി  അവര്‍ ഇരുവിഭാഗവുമായി ചര്‍ച്ചനടത്തി. ഇതിനേത്തുടര്‍ന്ന് കോടതിയില്‍ സ്വതന്ത്ര മാധ്യമപ്രവര്‍ത്തനം അനുവദിക്കാന്‍  തീരുമാനമായി. അതിനായി ജില്ലാ ജഡ്ജി അധ്യക്ഷയായി മീഡിയാ റിലേഷന്‍ കമ്മിറ്റി രൂപീകരിക്കും. മാധ്യമപ്രവര്‍ത്തകരും അഭിഭാഷകരും അടങ്ങുന്നതാണ് കമ്മിറ്റി. കഴിഞ്ഞദിവസം അടച്ച മീഡിയ റൂം ഉടന്‍ തുറന്നു പ്രവര്‍ത്തിക്കാനും തീരുമാനമായി.

ഹൈക്കോടതി ജഡ്ജിമാരും ജില്ലാ ജഡ്ജി വി. ഷര്‍ഫിയുമടങ്ങുന്ന സംഘമാണ് മാധ്യമപ്രവര്‍ത്തകരില്‍ നിന്ന് തെളിവെടുത്ത്. സുപ്രിം കോടതി ജഡ്ജി ജസ്റ്റിസ് കുര്യന്‍ ജോസഫിന്റെ നിര്‍ദേശപ്രകാരമാണ് ജഡ്ജിമാരുടെ സംഘമെത്തിയത്.

കോടതിയുടെ സുഗമമായ പ്രവര്‍ത്തനങ്ങള്‍ക്ക് അഭിഭാഷകരും മാധ്യമപ്രവര്‍ത്തകരും തമ്മിലുള്ള പ്രശ്‌നങ്ങള്‍ പരിഹരിക്കേണ്ടണ്ടതുണ്ടണ്ടെന്ന് അവര്‍ പറഞ്ഞു.
ഇതിനായി ജില്ലാജഡ്ജിമാരുടെ നേതൃത്വത്തില്‍ മാധ്യമപ്രതിനിധികളും അഭിഭാഷകപ്രതിനിധികളും അടങ്ങുന്ന സമിതി എല്ലാ ജില്ലകളിലും പ്രവര്‍ത്തനം ആരംഭിക്കാന്‍ നടപടി സ്വീകരിക്കുമെന്നും അവര്‍ അറിയിച്ചു. തിരുവനന്തപുരത്ത് സമിതി ഉടന്‍ രൂപീകരിക്കും.

ഇന്നലെ ഗസ്റ്റ് ഹൗസിലാണ് മാധ്യമപ്രവര്‍ത്തകരുടെ പ്രതിനിധികളുമായി ചര്‍ച്ചകള്‍ നടന്നത്. കെ.യു.ഡബ്ല്യു.ജെ ജില്ലാ കമ്മിറ്റിയുടെയും തിരുവനന്തപുരം പ്രസ്‌ക്ലബിന്റെയും ഭാരവാഹികള്‍ ചര്‍ച്ചയില്‍ പങ്കെടുത്തു. മാധ്യമപ്രവര്‍ത്തകര്‍ക്ക് സംഭവിച്ച പരിക്കുകളും നാശനഷ്ടങ്ങളും മാധ്യമപ്രതിനിധികള്‍ ജഡ്ജിമാരുടെ ശ്രദ്ധയില്‍പ്പെടുത്തി. അക്രമത്തില്‍ പരുക്കേറ്റവരെ ജഡ്ജിമാര്‍ ആശുപത്രിയില്‍ സന്ദര്‍ശിച്ചു.