മാഡ്രിഡ്: അത്‌ലറ്റികോ മാഡ്രിഡ് ക്യാപ്റ്റന്‍ ഡിയേഗോ ഗോഡിന്‍ അത്‌ലറ്റികോ വിടുന്നു. ഒന്‍പത് വര്‍ഷം അത്‌ലറ്റികോക്ക് വേണ്ടി ബൂട്ടണിഞ്ഞ ഗോഡിന്‍ ലോകത്തെ മികച്ച പ്രതിരോധനിരക്കാരുടെ പട്ടികയില്‍ ഇടംപിടിച്ച താരമാണ്. ജൂണില്‍ അത്‌ലറ്റികോയുമായുള്ള കരാര്‍ തീരുന്ന ഗോഡിന്‍ മാഡ്രിഡില്‍ വിളിച്ചു ചേര്‍ത്ത പത്രസമ്മേളനത്തിലാണ് താന്‍ ഈ വര്‍ഷം കരാര്‍ തീരുന്നതോടെ ക്ലബ് വിടുമെന്ന് അറിയിച്ചത്.

താരം അടുത്ത സീസണ്‍ മുതല്‍ ഇന്റര്‍ മിലാനില്‍ കളിക്കുമെന്ന് നേരത്തെ തന്നെ അഭ്യൂഹങ്ങള്‍ ഉണ്ടായിരുന്നു. പക്ഷേ ഗോഡിന്‍ ഇക്കാര്യം വെളിപ്പെടുത്തിയിട്ടില്ല.

33കാരനായ ഗോഡിന്‍ 2010 മുതല്‍ അത്‌ലറ്റികോ മാഡ്രിഡിനായി കളിക്കുന്നുണ്ട്. 380തോളം മത്സരങ്ങളില്‍ അത്‌ലറ്റികോക്ക് വേണ്ടി കളിച്ച ഗോഡിന്‍ 26 ഗോളുകളും അത്‌ലറ്റികോക്ക് വേണ്ടി നേടിയിട്ടുണ്ട്. അത്‌ലറ്റികോ മാഡ്രിഡിനൊപ്പം ഒരു ലാലിഗ കിരീടം, രണ്ട് യൂറോപ്പ ലീഗ് കിരീടം ഒരു കോപ ഡെല്‍ റേ എന്നിവയും ഗോഡിന്‍ നേടിയിട്ടുണ്ട്. ഒപ്പം രണ്ട് തവണ ചാംപ്യന്‍സ് ലീഗ് ഫൈനലില്‍ അത്‌ലറ്റികോ മാഡ്രിഡ് എത്തിയപ്പോഴും ഗോഡിന്‍ ടീമിലെ പ്രധാന ഘടകമായിരുന്നു.