മാഡ്രിഡ്: റെക്കോര്‍ഡ് തുകക്ക് പി.എസ്.ജി താരം കിലിയന്‍ എംബാപ്പെ റയല്‍ മാഡ്രിഡിലേക്ക് പോകുമെന്ന് റിപ്പോര്‍ട്ടുകള്‍. കഴിഞ്ഞ ദിവസം ഡെയ്‌ലി മെയ്‌ലാണ് ഇക്കാര്യം പുറത്ത് വിട്ടത്.

ക്രിസ്റ്റ്യാനോ റൊണാള്‍ഡോയുടെ കൂടുമാറ്റത്തിനുശേഷം നിറംമങ്ങിയ റയല്‍ മാഡ്രിഡിനെ പുതിയ സീസണില്‍ കരുത്തുറ്റതാക്കാനുള്ള നീക്കത്തിന്റെ ഭാഗമായാണ് എംബാപ്പെയെ ടീമിലെത്തിക്കുന്നത്. ഹസാര്‍ഡ് പുതിയ സീസണില്‍ റയലിലെത്തിയേക്കുമെന്ന അഭ്യൂഹങ്ങള്‍ക്കിടെയാണ് എംബാപ്പെയെ റാഞ്ചാനുള്ള നീക്കം ആരംഭിച്ചത്. ഇതുവരെ ആര്‍ക്കും ലഭിക്കാത്ത റെക്കോര്‍ഡ് തുകക്കായിരിക്കും താരം റയലിലെത്തുക. സിനദിന്‍ സിദാന്റെ പട്ടികയില്‍ ഉള്‍പ്പെട്ട താരമായിരുന്നു എംബാപ്പെ. 280 മില്യണ്‍ യൂറോയാണ് എംബാപ്പെക്കായി റയല്‍ വാഗ്ദാനം ചെയ്തിരിക്കുന്നത്.
വാഗ്ദാനം സ്വീകരിച്ചാല്‍ നെയ്മര്‍ പി.എസ്.ജിയില്‍ എത്തിയതിനെക്കാള്‍ തുകയായിരിക്കും എംബാപ്പെക്ക് റയല്‍ നല്‍കുക. മാഞ്ചസ്റ്റര്‍ യുനൈറ്റഡില്‍ നിന്ന് പോള്‍ പോഗ്ബ, ചെല്‍സിയുടെ ഹസാര്‍ഡ് എന്നിവരെയും ടീമിലെത്തിച്ച് കൂടുതല്‍ കരുത്തോടെ സീസണ്‍ തുടങ്ങാമെന്നാണ് പരിശീലകന്‍ സിനദിന്‍ സിദാന്റെ പ്രതീക്ഷ. കഴിഞ്ഞ സീസണില്‍ പൂര്‍ണ പരാജയമായി മാറിയ റയലിനെ അടുത്ത സീസണില്‍ ഉയര്‍ത്തിക്കൊണ്ടുവരിക എന്ന ലക്ഷ്യത്തിലാണ് റയല്‍ മാനേജ്‌മെന്റും പരിശീലകന്‍ സിദാനും.