ഖാര്‍ത്തൂം: സാമ്പത്തികസഹായം ലഭിക്കുമെങ്കില്‍ ഇസ്‌റാഈലുമായി കരാറിന് ഒരുക്കമാണെന്ന് സുദാന്‍. യു.എസ്, യു.എ.ഇ ഉദ്യോഗസ്ഥരുമായി നടത്തിയ ചര്‍ച്ചയിലാണ് ഇക്കാര്യം വ്യക്തമായതെന്ന് ഇസ്‌റാഈലിലെ വല്ല വാര്‍ത്താ വെബ്‌സൈറ്റ് റിപ്പോര്‍ട്ട് ചെയ്തു. കോടിക്കണക്കിന് ഡോളറിന്റെ സാമ്പത്തികസഹായമാണ് സുദാന്‍ ആവശ്യപ്പെടുന്നത്. അതിനു സമ്മതിച്ചാല്‍ ദിവസങ്ങള്‍ക്കകം കരാറില്‍ ഒപ്പിട്ടേക്കും. 

അടുത്തിടെയുണ്ടായ വന്‍ പ്രളയത്തെ തുടര്‍ന്നുണ്ടായ സാമ്പത്തിക പ്രതിസന്ധി മറികടക്കാന്‍ 120 കോടി ഡോളറിന്റെ എണ്ണയും ഗോതമ്പും എത്തിച്ചുനല്‍കണമെന്നാണ് സുദാന്‍ ആവശ്യപ്പെട്ടതെന്നാണ് വിവരം. ഇതിനു പുറമെ സാമ്പത്തികമാന്ദ്യം മറികടക്കാന്‍ 200 കോടി ഡോളറിന്റെ സഹായവും സുദാന്‍ ആവശ്യപ്പെടുന്നു. 

അതേസമയം ഒരുനിലയ്ക്കും ഇസ്‌റാഈലുമായി നയതന്ത്രബന്ധത്തിനില്ലെന്ന ഉറച്ച നിലപാടിലാണ് ഖത്തര്‍. എന്നാല്‍ സഊദി കരാറിലൊപ്പിടണമെന്ന് കിരീടാവകാശി മുഹമ്മദ് ബിന്‍ സല്‍മാന്‍ ആവശ്യപ്പെടുമ്പോള്‍ പലസ്തീനികള്‍ക്കൊപ്പം നില്‍ക്കാനാണ് സല്‍മാന്‍ രാജാവ് താല്‍പര്യപ്പെടുന്നതെന്ന് കഴിഞ്ഞദിവസം വാള്‍സ്ട്രീറ്റ് ജേണല്‍ റിപ്പോര്‍ട്ട് ചെയ്തിരുന്നു.