തൃശൂര്‍: 23ാമത് ദുബൈ ഇന്റര്‍നാഷനല്‍ ഹോളി ഖുര്‍ആന്‍ അവാര്‍ഡ് ദാന ചടങ്ങില്‍ എസ്.കെ.എസ്.എസ്.എഫ്് സംസ്ഥാന സീനിയര്‍ വൈസ്പ്രസിഡന്റ് ബശീര്‍ ഫൈസി ദേശമംഗലം സംബന്ധിക്കും. ദുബൈ ഭരണാധികാരി ശൈഖ് മുഹമ്മദിന്റെ അതിഥിയായാണ് അദ്ദേഹം അവാര്‍ഡ് ദാന ചടങ്ങില്‍ പങ്കെടുക്കുക.
മെയ് 17 രാത്രി 10ന് ദുബൈ അല്‍ ജദ്ദാഫിലെ അല്‍ വസല്‍ ക്ലബില്‍ 'ഖുര്‍ആന്‍ ജീവിതവും പ്രയോഗവും' എന്ന വിഷയത്തില്‍ പ്രഭാഷണം നടത്തും. തുടര്‍ന്ന് ഹോളി ഖുര്‍ആന്‍ സമിതിയുടെ വിവിധ പരിപാടികളില്‍ പങ്കെടുക്കും. പ്രബോധന പ്രഭാഷണ രംഗത്തെ നിരവധി പുരസ്‌കാരങ്ങള്‍ക്ക് അര്‍ഹനായ ബശീര്‍ ഫൈസി സമസ്ത തൃശൂര്‍ ജില്ലാ വര്‍ക്കിങ് സെക്രട്ടറിയാണ്.
സമസ്ത സെക്രട്ടറി പി.പി ഉമര്‍ മുസ്‌ലിയാര്‍, എസ്.വൈ.എസ് സംസ്ഥാന സെക്രട്ടറി അബ്ദുസമദ് പൂക്കോട്ടൂര്‍ എന്നിവരും ശൈഖ് മുഹമ്മദിന്റെ അതിഥികളായി ചടങ്ങില്‍ പങ്കെടുക്കുന്നുണ്ട്.