കൊച്ചി: കളമശേരി ബസ് കത്തിക്കല്‍ കേസിന്റെ സാക്ഷി വിസ്താരം 25ലേക്ക് മാറ്റി. കേസിലെ പ്രധാന സാക്ഷിയായ ബസ് ഡ്രൈവര്‍ ഇന്നലെ ഹാജരാകാതിരുന്നതിനെ തുടര്‍ന്നാണ് വിസ്താരം മാറ്റിവച്ചത്. കേസില്‍ മഅ്ദനിയുടെ ഭാര്യ സൂഫിയ മഅ്ദനി ഉള്‍പ്പെടെ ആറു പ്രതികള്‍ മാത്രമാണ് ഇന്നലെ എന്‍.ഐ.എ കോടതിയില്‍ ഹാജരായത്.
ബംഗളൂരുവിലെ ജയിലില്‍ കഴിയുന്നതിനാല്‍ തടിയന്റവിട നസീര്‍, സാബിര്‍ ബുഹാരി, ഉമ്മര്‍ ഫാറൂഖ്, താജുദ്ദീന്‍ എന്നിവര്‍ക്കും കോടതിയില്‍ ഹാജരാകാനായില്ല. ബംഗളൂരു ജയിലില്‍ കഴിയുന്നവരെ എന്ന് ഹാജരാക്കാന്‍ കഴിയുമെന്നത് സംബന്ധിച്ചു റിപ്പോര്‍ട്ട് സമര്‍പ്പിക്കാന്‍ അന്വേഷണ ഉദ്യോഗസ്ഥനോട് കോടതി നിര്‍ദേശിച്ചിട്ടുണ്ട്. ഈ റിപ്പോര്‍ട്ട് ലഭിച്ചതിനു ശേഷമാകും വിചാരണ നടപടികള്‍ സംബന്ധിച്ച കൃത്യമായ തിയതികളിലേക്ക് കോടതിക്ക് എത്താനാകൂ.
സൂഫിയ അടക്കം ആറു പ്രതികള്‍ വെള്ളിയാഴ്ച കോടതിയില്‍ നേരിട്ട് ഹാജരായപ്പോള്‍ വിയ്യൂര്‍ ജയിലില്‍ കഴിയുന്ന പ്രതി കെ.എ അനൂപ് വീഡിയോ കോണ്‍ഫറന്‍സിങ് വഴിയും നടപടികളില്‍ പങ്കെടുത്തു. സൂഫിയ മഅദ്‌നിക്ക് പുറമെ മജീദ് പറമ്പായി, അബ്ദുല്‍ ഹാലിം, മുഹമ്മദ് നവാസ്, ഇസ്മയില്‍, നാസര്‍ എന്നീ പ്രതികളാണ് വെള്ളിയാഴ്ച കോടതിയില്‍ ഹാജരായത്. 2005 സെംപ്റ്റംബര്‍ ഒന്‍പതിനാണ് എറണാകുളം കെ.എസ്.ആര്‍.ടി.സി സ്റ്റാന്‍ഡില്‍ നിന്ന് സേലത്തേക്കുള്ള തമിഴ്‌നാട് ട്രാന്‍സ്‌പോര്‍ട്ട് കോര്‍പറേഷന്റെ ബസ് പ്രതികള്‍ തോക്കുചൂണ്ടി തട്ടിക്കൊണ്ടുപോയത്.