ലുധിയാന: ഇന്ത്യന്‍ വനിതാ ഫുട്‌ബോള്‍ ലീഗില്‍ കുതിപ്പ് നടത്തുന്ന ഗോകുലം എഫ്.സി സെമിയില്‍. ഗ്രൂപ്പ് ഘട്ടത്തിലെ നാലാം മത്സരത്തിലും ജയം സ്വന്തമാക്കിയാണ് ഗോകുലം സെമിയില്‍ പ്രവേശിച്ചത്. ഇതാദ്യമായാണ് ഒരു കേരള ക്ലബ് ഇന്ത്യന്‍ വനിതാ ലീഗിന്റെ സെമിയില്‍ എത്തുന്നത്. കഴിഞ്ഞ സീസണിലും ഇന്ത്യന്‍ വനിതാ ലീഗില്‍ ഗോകുലം കേരള എഫ്.സി പങ്കെടുത്തിരുന്നു എങ്കിലും സെമിയിലെത്താനാകാതെ പുറത്താവുകയായിരുന്നു.
ഇന്നലെ വൈകിട്ട് നടന്ന മത്സരത്തില്‍ പഞ്ചിം ഫുട്‌ബോളേഴ്‌സിനെ ആണ് ഗോകുലം എഫ്.സി പരാജയപ്പെടുത്തിയത്. ഏകപക്ഷീയമായ മത്സരത്തില്‍ എതിരില്ലാത്ത രണ്ട@ു ഗോളുകള്‍ക്കായിരുന്നു ഗോകുലത്തിന്റെ വിജയം. ദാലിമ ചിബറിനും രഞ്ജനക്കും വിശ്രമം അനുവദിച്ചായിരുന്നു ഗോകുലം ഇറങ്ങിയത്.
ആദ്യ പകുതിയില്‍ സഞ്ജുവും രണ്ട@ാം പകുതിയില്‍ അഞ്ജു തമാംഗും ആയിരുന്നു ഗോകുലം കേരള എഫ്.സിക്കായി ഗോള്‍ കണ്ടെത്തിയത്.
ഈ ജയത്തോടെ ഗോകുലം കേരള എഫ്.സിക്ക് നാല് മത്സരങ്ങളില്‍ നിന്ന് 12 പോയിന്റായി. ഇതോടെ ഗോകുലം കേരള എഫ്.സി ഒരു മത്സരം ബാക്കി നില്‍ക്കെ ഗ്രൂപ്പിലെ ഒന്നാം സ്ഥാനവും സെമിയും ഉറപ്പിച്ചു.