കരുവാരകുണ്ട്: കെ.ടി മാനു മുസ്‌ലിയാര്‍ മാതൃകാപരമായ ദീനീ പ്രബോധകനായിരുന്നുവെന്ന് സമസ്ത ജന.സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍. കെ.ടി മാനു മുസ്‌ലിയാര്‍ പന്ത്രണ്ടാമത് അനുസ്മരണവും സിയാറത്തും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

വലിയ പ്രയാസങ്ങള്‍ സഹിച്ച് അഗതികള്‍ക്കും അനാഥകള്‍ക്കും വേണ്ടി കഠിനാധ്വാനം നടത്തി. യാതൊരു മോഹങ്ങളുമില്ലാതെ ആത്മാര്‍ഥ സേവനത്തിന് കെ.ടി മാനു മുസ്‌ലിയാര്‍ നേതൃത്വം നല്‍കിയെന്നും അദ്ദേഹം കൂട്ടിച്ചേര്‍ത്തു.  പി. സൈതാലി മുസ്‌ലിയാര്‍ അധ്യക്ഷനായി. ഒ. കുട്ടി മുസ്‌ലിയാര്‍ സിയാറത്തിന് നേതൃത്വം നല്‍കി. സി സുലൈമാന്‍ ദാരിമി ഏലംകുളം അനുസ്മരണ പ്രഭാഷണം നടത്തി. 

സമസ്ത കേന്ദ്ര മുശാവറ അംഗം വാക്കോട് മൊയ്തീന്‍ കുട്ടി ഫൈസി, മൊയ്തീന്‍ ഫൈസി പുത്തനഴി, അബ്ദുല്‍ ഹമീദ് ഫൈസി അമ്പലക്കടവ്, അഡ്വ. എം. ഉമ്മര്‍ എം.എല്‍.എ, ഹംസല്‍ ഖാസിമി, അലവി മുസ്‌ലിയാര്‍, പഞ്ചായത്ത് പ്രസിഡന്റ് പി. ഷൗഖത്തലി, സൈദലവി ഫൈസി, അബൂബക്കര്‍ മുസ്‌ലിയാര്‍, അബ്ദുല്‍ കരീം ബാഖവി, അബ്ദുല്ല മൗലവി, ഉസ്മാന്‍ ഫൈസി, അലി ഫൈസി പങ്കെടുത്തു.