തിരുവനന്തപുരം: യു.ഡി.എഫ് അധികാരത്തിലെത്തിയാല്‍ തിരുവനന്തപുരം യൂനിവേഴ്‌സിറ്റി കോളജ് കാര്യവട്ടത്തേക്ക് മാറ്റണമെന്ന് കെ. മുരളീധരന്‍ എം.എല്‍.എ. കാംപസ് ഫാസിസത്തിനെതിരേ കെ.എസ്.യു പാളയം രക്തസാക്ഷിമണ്ഡപത്തില്‍ സംഘടിപ്പിച്ച ഏകദിന ഉപവാസ സമരത്തിന് പിന്തുണയര്‍പ്പിച്ച് സംസാരിക്കുകയായിരുന്നു അദ്ദേഹം.
കോളജ് മാറ്റിയതിനുശേഷം ഇവിടത്തെ കെട്ടിടങ്ങള്‍ പൊളിച്ചുകളയണം. അല്ലെങ്കില്‍ ചരിത്രമ്യൂസിയമാക്കണം. ഒരുകൂട്ടം അക്രമികളുടെ കൈയിലാണ് ഇപ്പോള്‍ കോളജുള്ളത്. കോളജ് മാറ്റിയശേഷം കെട്ടിടം അവശേഷിപ്പിച്ചാല്‍ കെട്ടിടം കാണുമ്പോള്‍ എസ്.എഫ്.ഐക്കാര്‍ക്ക് ചൊറിച്ചില്‍ തോന്നാം.
ഈ സ്ഥലത്ത് വേണമെങ്കില്‍ സര്‍ക്കാര്‍ ഓഫിസുകള്‍ പണിയാം. ഇങ്ങനെയൊരു കോളജ് തലസ്ഥാനത്ത് ആവശ്യമുണ്ടോ എന്നും ആലോചിക്കണമെന്നും മുരളീധരന്‍ പറഞ്ഞു.