കല്‍പ്പറ്റ: ജില്ലയില്‍ ആദ്യമായി നടക്കുന്ന വ്യോമസേന റിക്രൂട്ട്‌മെന്റ് റാലിയുടെ ജില്ലയിലെ ഉദ്യോഗാര്‍ഥികള്‍ക്കായുള്ള പ്രീ രജിസ്‌ട്രേഷന്‍ എസ്.കെ.എം.ജെ സ്‌കൂളില്‍ തുടങ്ങി. ആദ്യദിനം 244 പേരാണ് രജിസ്‌ട്രേഷന്‍ നടത്തിയത്. നാനൂറോളം പേരാണ് രജിസ്‌ട്രേഷനായി എത്തിയിരുന്നത്.
 158 പേരുടെ രജിസ്‌ട്രേഷന്‍ വിവിധ കാരണങ്ങളാല്‍ തള്ളി. പ്രായപരിധി കഴിഞ്ഞവര്‍, സര്‍ട്ടിഫിക്കറ്റ് ഹാജരാക്കാന്‍ കഴിയാത്തവര്‍, മതിയായ യോഗ്യതയില്ലാത്തത് തുടങ്ങിയ കാരണങ്ങളിലാണ് അപേക്ഷകള്‍ നിരസിച്ചത്. രാവിലെ 7 മുതല്‍ ഉച്ചക്ക് ഒന്ന് വരെയാണ് രജിസ്‌ട്രേഷന്‍ നടന്നത്. ഇന്നും രാവിലെ മുതല്‍ രജിസ്‌ട്രേഷന്‍ നടക്കും. വി.എച്ച്.എസി.സി വിഭാഗത്തില്‍ നിന്നും ഹയര്‍സെക്കന്‍ഡറി വിജയിച്ചവര്‍ക്കും യോഗ്യത സര്‍ട്ടിഫിക്കറ്റ് കൈയിലില്ലാത്തവരെയും വനിതാ ഉദ്യോഗാര്‍ഥികളേയും രജിസ്‌ട്രേഷന് പരിഗണക്കില്ല. എസ്.എസ്.എല്‍.സി, പ്ലസ് ടു വിജയിച്ച അസല്‍ സര്‍ട്ടിഫിക്കറ്റ്, സ്ഥിരവാസ സര്‍ട്ടിഫിക്കറ്റ്, നാല് കോപ്പി ഫോട്ടോ എന്നിവ സഹിതമാണ് പ്രി-രജിസ്‌ട്രേഷനും റാലിക്കും ഹാജരാകേണ്ടത്.  പ്ലസ്ടു പരീക്ഷയെഴുതി ഫലം കാത്തിരിക്കുന്നവര്‍ക്ക് ഈ യോഗ്യത അടിസ്ഥാനമാക്കി രജിസ്‌ട്രേഷന്‍ നടത്താന്‍ കഴിയില്ല.
മെയ് 25 മുതല്‍ 30 വരെയാണ് കല്‍പ്പറ്റ എസ്.കെ.എം.ജെ ഹയര്‍ സെക്കന്‍ഡറി സ്‌കൂളില്‍ റിക്രൂട്ട്‌മെന്റ് റാലി നടക്കുക. ഓട്ടോ ടെക്‌നീഷന്‍, ഗ്രൗണ്ട് ട്രെയിനിങ് ഇന്‍സ്‌പെക്ടര്‍, ഇന്ത്യന്‍ എയര്‍  ഫോഴ്‌സ് പൊലിസ്, മെഡിക്കല്‍ അസിസ്റ്റന്റ് എന്നി തസ്തികകളിലേക്കാണ് സെലക്ഷന്‍ റാലി നടത്തുത്.  രജിസ്‌ട്രേഷന് ഹാജരാക്കുന്ന നേറ്റിവിറ്റി, ഡൊമിസൈല്‍ സര്‍ട്ടിഫിക്കറ്റില്‍ അപേക്ഷകര്‍ ജില്ല വ്യക്തമായി രേഖപ്പെടുത്തണമെന്നും അധികൃതര്‍ അറിയിച്ചു.