ഗസ്‌നി: ദക്ഷിണ അഫ്ഗാനിസ്താനില്‍ കുഴിബോംബ് പൊട്ടി ഏഴു കുട്ടികള്‍ കൊല്ലപ്പെടുകയും രണ്ടുപേര്‍ക്ക് പരുക്കേല്‍ക്കുകയും ചെയ്തു. തലസ്ഥാനമായ കാബൂളിനു തെക്കുഭാഗമായ ഗസ്‌നി മേഖലയില്‍ റോഡരികില്‍ കളിച്ചുകൊണ്ടിരിക്കുകയായിരുന്ന കുട്ടികള്‍ കുഴിബോംബില്‍ ചവിട്ടിയപ്പോഴാണ് സ്‌ഫോടനമുണ്ടായതെന്ന് മേഖലാ വക്താവ് ആരിഫ് നൂറി പറഞ്ഞതായി എ.എഫ്.പി റിപ്പോര്‍ട്ട് ചെയ്തു. സുരക്ഷാ സേനയെ ലക്ഷ്യമിട്ട് താലിബാനാണ് റോഡരികില്‍ കുഴിബോംബ് സ്ഥാപിച്ചതെന്നും അദ്ദേഹം പറഞ്ഞു. എന്നാല്‍, ഇക്കാര്യത്തില്‍ താലിബാന്‍ പ്രതികരിച്ചിട്ടില്ല. ഏഴിനും ഒന്‍പതിനും വയസുകള്‍ക്കിടയിലുള്ള കുട്ടികളാണ് കൊല്ലപ്പെട്ടതെന്നും അവരില്‍ നാലുപേര്‍ ഒരു കുടുംബത്തില്‍ നിന്നുള്ളവരാണെന്നും ഗസ്‌നി പ്രവിശ്യാ കൗണ്‍സില്‍ അംഗം അമാനുല്ലാ കമറാനി പറഞ്ഞു.

അധിനിവേശ സേനയെ ലക്ഷ്യമിട്ട് റോഡരികില്‍ സ്ഥാപിച്ച കുഴിബോംബുകളും മോര്‍ട്ടാറുകളും നാടന്‍ബോംബുകളും പൊട്ടിയും റോക്കറ്റുകള്‍ പതിച്ചും അഫ്ഗാനില്‍ സിവിലിയന്മാര്‍ കൊല്ലപ്പെട്ട നിരവധി സംഭവങ്ങളുണ്ടായിട്ടുണ്ട്. ഇതിലധികവും കുട്ടികളാണ്. കഴിഞ്ഞമാസം മോര്‍ട്ടാര്‍ ഷെല്‍ പൊട്ടി ലാഗ്മനില്‍ പത്തിലധികം കുട്ടികള്‍ കൊല്ലപ്പെട്ടിരുന്നു. ഐക്യരാഷ്ട്ര സഭയുടെ കണക്കനുസരിച്ച് 2018ല്‍ 3,804 സാധാരണക്കാര്‍ അഫ്ഗാനിസ്താനില്‍ കൊല്ലപ്പെട്ടപ്പോള്‍ അതില്‍ 900ത്തിലേറെ പേര്‍ കുട്ടികളായിരുന്നു. 7000ത്തോളം പേര്‍ക്ക് പരുക്കേല്‍ക്കുകയും ചെയ്തു.