കൊച്ചി: സൗഹൃദ രാഷ്ട്രത്തിനെതിരേ യുദ്ധം ചെയ്തതുമായി ബന്ധപ്പെട്ട് സംസ്ഥാനത്ത് ആദ്യമായി രജിസ്റ്റര്‍ ചെയ്ത കേസില്‍ പ്രതി തൊടുപുഴ മാര്‍ക്കറ്റ് റോഡില്‍ സുബ്ഹാനി ഹാജ മൊയ്തീന്‍ (34) കുറ്റക്കാരനാണെന്ന് കോടതി. എന്‍.ഐ.എ പ്രത്യേക കോടതി ജഡ്ജി പി.കൃഷ്ണകുമാറാണ് പ്രതി കുറ്റക്കാരനെന്ന് കണ്ടെത്തിയത്. ശിക്ഷ 28നു വിധിക്കും. ഐ.എസുമായി ചേര്‍ന്ന് ഇറാഖിനെതിരേ യുദ്ധം നടത്തിയെന്നാണ് കേസ്.
ഇന്ത്യന്‍ ശിക്ഷാ നിയമം 125 പ്രകാരം ഇന്ത്യയുമായി സൗഹൃദത്തിലുള്ള ഏഷ്യന്‍ രാജ്യത്തിനെതിരേ യുദ്ധം ചെയ്യുക, യു.എ.പി.എ വകുപ്പ് 20 അനുസരിച്ചു ഭീകര സംഘടനയില്‍ അംഗമാകുക, വകുപ്പ് 38 അനുസരിച്ചു ഭീകര സംഘടനയില്‍ അംഗമാകാനായി പരിശ്രമിക്കുക, വകുപ്പ് 39 അനുസരിച്ച് ഭീകരസംഘടനയെ പിന്തുണയ്ക്കുക, അവരോടു സഹകരിക്കുക, ഇന്ത്യന്‍ ശിക്ഷാ നിയമം വകുപ്പ് 120 ബി പ്രകാരമുള്ള ഗൂഢാലോചന എന്നീ കുറ്റങ്ങളാണ് പ്രതിക്കെതിരേ കോടതി കണ്ടെത്തിയത്. അതേസമയം തന്റെ പ്രായവും കുടുംബത്തിന്റ അവസ്ഥയും ശിക്ഷ വിധിക്കുമ്പോള്‍ പരിഗണിക്കണമെന്ന് സുബ്്ഹാനി കോടതിയോട് ആവശ്യപ്പെട്ടു. താന്‍ അക്രമത്തില്‍ വിശ്വസിക്കുന്നില്ല, സമാധാനത്തിലാണ് വിശ്വാസം. ഒരു രാജ്യത്തിനെതിരേയും യുദ്ധം ചെയ്തിട്ടില്ല. കോടതിയുടെ വിധി അംഗീകരിക്കാന്‍ തയാറാണ്. എന്നാല്‍ അന്തിമ വിധി സര്‍വശക്തനായ ദൈവത്തിന്റെതാണെന്നും സുബ്ഹാനി പറഞ്ഞു. 2015 ല്‍ തുര്‍ക്കി വഴി ഇറാഖിലേക്കു കടന്ന സുബ്ഹാനി ഐ.എസില്‍ ചേര്‍ന്ന് ആയുധ പരിശീലനം നേടിയ ശേഷമാണ് മൊസൂളിനടുത്തുള്ള യുദ്ധഭൂമിയില്‍ മറ്റുള്ളവര്‍ക്കൊപ്പം എത്തിയതെന്നാണ് എന്‍.ഐ.എ ആരോപണം.