കല്യാശ്ശേരി: പാപ്പിനിശേരി എക്‌സൈസ് സംഘത്തിന്റെ പരിശോധനയ്ക്കിടയില്‍ വിദ്യാലയ പരിസരത്ത് നിന്നും ഹാഷിഷ് ഓയിലുമായി യുവാവിനെ പിടികൂടി. ഇന്നലെ ഉച്ചയോടെ നടത്തിയ പരിശോധനയ്ക്കിടയിലാണ് എടക്കാട് സ്വദേശി യു. അഖില്‍ (20) പിടിയിലായത്.
കല്യാശ്ശേരി ഇ.കെ നായനാര്‍ സ്മാരക മോഡല്‍ പോളി ടെക്‌നിക്കിന് സമീപത്ത് വില്‍പ്പന നടത്താന്‍ എത്തിയതായിരുന്നു അഖിലെന്ന് എക്‌സൈസ് ഇന്‍സ്‌പെക്ടര്‍ എ. ഹേമന്ത് കുമാര്‍ പറഞ്ഞു. യുവാവില്‍ നിന്നും ആറ് ഗ്രാം ഹാഷിഷ് ഓയില്‍ പിടിച്ചെടുത്തു. വിദ്യാലയങ്ങളും കോളജുകളും കേന്ദീകരിച്ച് തകൃതിയായി മയക്കുമരുന്ന് വിപണനം നടക്കുന്നതായുള്ള രഹസ്യ വിവരത്തിന്റെ അടിസ്ഥാനത്തിലാണ് എക്‌സൈസ് ഉദ്യോഗസ്ഥര്‍ പരിശോധന ശക്തമാക്കിയത്.