മാള: ഒഡീഷ സ്വദേശിയായ പെണ്‍കുട്ടിയോട് മോശമായി പെരുമാറിയ മധ്യവയസ്‌കനെതിരെ മാള പൊലിസ് കേസെടുത്ത് പ്രതിയെ അറസ്റ്റ് ചെയ്തു. കൊരട്ടി പൊങ്ങം സ്വദേശി തണ്ടപ്പശ്ശേരി ഫ്രാന്‍സിസ്(67) എന്നയാളെയാണ് മാള സി.ഐയുടെ നേതൃത്വത്തിലുള്ള പൊലിസ് അറസ്റ്റ് ചെയ്തത്.  ലൈസന്‍സില്ലാതെ ഒഡീഷ സ്വദേശികളെ കേരളത്തിലെത്തിച്ച് വിവിധ ജോലികള്‍ക്കായി വിതരണം ചെയ്യുന്ന ഏര്‍പ്പാടാണിയാള്‍ക്ക്. കഴിഞ്ഞ ബുധനാഴ്ച ഒഡീഷ സ്വദേശിയായ പെണ്‍കുട്ടി നാട്ടില്‍ പോകണമെന്ന ആവശ്യവുമായി കൊരട്ടിയിലെ ഇയാളുടെ ഓഫീസില്‍ എത്തി.
പെണ്‍കുട്ടിയെ മുറിയില്‍ പൂട്ടിയിട്ട് പീഡിപ്പിക്കാന്‍ ശ്രമിച്ചുവെന്നാണ് പരാതി. ശ്രമം വിഫലമായതിനെ തുടര്‍ന്ന് ഇയാള്‍ മുറി പൂട്ടി പോയി.  രാത്രിയായപ്പോള്‍ 18 വയസ്സുകാരിയായ പെണ്‍കുട്ടി റൂമിന്റെ വെന്റിലേറ്ററിലൂടെ പുറത്ത് കടന്നു. തുടര്‍ന്ന് അന്നമനട ആശാഭവനിലേക്ക് കുട്ടിയെത്തി. തുടര്‍ന്ന് വ്യാഴാഴ്ച വിവരമറിഞ്ഞെത്തിയ മാള പൊലിസ് പെണ്‍കുട്ടിയുടെ മൊഴിയെടുത്തു. മാനഭംഗ ശ്രമം, പ്രായപൂര്‍ത്തിയാകാത്ത കുട്ടിയെകൊണ്ട് പണിയെടുപ്പിക്കാനായി കൊണ്ടുവരിക തുടങ്ങിയ വകുപ്പുകള്‍ ചേര്‍ത്താണ് കേസ്സെടുത്തത്.
പ്രതിയെ മാള സി.ഐ വി.റോയ്, എസ്.ഐ ഇതിഹാസ് താഹ, എ.എസ്.ഐ നീല്‍ ഹെക്റ്റര്‍, എച്ച്.ജി മനോജ്, വുമണ്‍ സി.പി.ഒ ബിന്ദു എന്നിവരുടെ നേതൃത്വത്തില്‍ അറസ്റ്റ് ചെയ്യുകയായിരുന്നു. ചാലക്കുടി ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി പ്രതിയെ റിമാന്റെ ചെയ്തു.