ബംഗളൂരു: പ്രമുഖ ഐ.ടി കമ്പനിയായ വിപ്രോയെ ആക്രമിക്കുമെന്ന് വ്യക്തമാക്കി ഭീഷണി സന്ദേശം. 500 കോടി രൂപ നല്‍കണമെന്നാവശ്യപ്പെട്ട് അജ്ഞാത ഉറവിടത്തില്‍ നിന്നാണ് ഭീഷണി സന്ദേശം എത്തിയത്.
സന്ദേശം എത്തിയതോടെ വിപ്രോ അധികൃതര്‍ പൊലിസില്‍ പരാതി നല്‍കിയിട്ടുണ്ട്. രാജ്യത്തെ വിപ്രോയുടെ എല്ലാ ഓഫിസുകള്‍ക്കും സുരക്ഷ കര്‍ശനമാക്കിയിട്ടുണ്ട്. വിപ്രോക്ക് ഇ-മെയില്‍ വഴി ഭീഷണി സന്ദേശം ലഭിച്ചിട്ടുണ്ടെന്ന് പൊലിസ് സ്ഥിരീകരിച്ചു. പണം നല്‍കിയില്ലെങ്കില്‍ ജൈവ വിഷപദാര്‍ഥം ഉപയോഗിച്ച് ആക്രമണം നടത്തുമെന്നാണ് മുന്നറിയിപ്പ്. മെയ് 25നകം പണം നല്‍കണമെന്നാണ് സന്ദേശത്തില്‍ അറിയിച്ചിട്ടുള്ളത്. വിഷപദാര്‍ഥത്തിന്റെ ചിത്രവും ഇ-മെയില്‍ വഴി അയച്ചിട്ടുണ്ട്. രണ്ട് ഗ്രാമിന്റെ വിഷവസ്തു അടുത്ത ദിവസം കമ്പനി ഓഫിസില്‍ എത്തുമെന്നും പറയുന്നുണ്ട്. ശ്വസനത്തിലൂടെയും ഭക്ഷണത്തിലൂടെയും മനുഷ്യരെ കൊലപ്പെടുത്താന്‍ കഴിയുന്ന റിസിന്‍ എന്ന വിഷവസ്തുവാണ് ഉപയോഗിക്കുകയെന്നാണ് മുന്നറിയിപ്പ്.