കൊയിലാണ്ടി: നഗരസഭയുടെ സമ്പൂര്‍ണ മാലിന്യസംസ്‌കരണ ഹരിതവല്‍ക്കരണ പദ്ധതിയായ 'ക്ലീന്‍ ആന്‍ഡ് ഗ്രീന്‍' പദ്ധതിയുടെ ഭാഗമായി നഗരത്തില്‍ ഹരിതകര്‍മ്മ സേന രംഗത്തിറങ്ങി.
വളണ്ടിയര്‍മാര്‍ക്കുള്ള യൂനിഫോമും തിരിച്ചറിയല്‍ കാര്‍ഡുകളും നഗരസഭാ ചെയര്‍മാന്‍ കെ. സത്യന്‍ വിതരണം ചെയ്തു. വാര്‍ഡുകളില്‍ യൂസര്‍ ഫീ ഈടാക്കി ഇവര്‍ ജൈവമാലിന്യം ശേഖരിക്കും.
പ്ലാസ്റ്റിക്, ഇ മാലിന്യം, ലതര്‍, കുപ്പി തുടങ്ങിയ ജൈവമാലിന്യമാണ് ഇവര്‍ ശേഖരിക്കുക. വാര്‍ഡുകളില്‍ നിന്ന് ശേഖരിക്കുന്ന ജൈവമാലിന്യങ്ങള്‍ നഗരസഭാതലത്തില്‍ കേന്ദ്രീകരിച്ച് തരംതിരിക്കല്‍, ഷഡ്ഡിങ്ങ് തുടങ്ങിയ പ്രക്രയക്ക് വിധേയമാക്കി വിവിധ ഏജന്‍സികള്‍ക്കു കൈമാറും.
നഗരസഭയില്‍ നടന്ന ചടങ്ങില്‍ നഗരസഭാ കൗണ്‍സിലര്‍ എം. സുരേന്ദ്രന്‍ അധ്യക്ഷനായി. പി.എം ബിജു, ഒ.കെ ബാലന്‍, സീമ കുന്നുമ്മല്‍, കെ.കെ ചന്ദ്രിക, ഹെല്‍ത്ത് ഇന്‍സ്‌പെക്ടര്‍ എം. അബ്ദുല്‍ മജീദ്, കെ.എം പ്രസാദ് സംസാരിച്ചു.