കോഴിക്കോട്: കോര്‍പറേഷന്‍ വാങ്ങിയ ശുചീകരണ സാമഗ്രികളുടേയും വാഹനങ്ങളുടേയും പ്രവര്‍ത്തനോദ്ഘാടനം മേയര്‍ തോട്ടത്തില്‍ രവീന്ദ്രന്‍ നിര്‍വഹിച്ചു.
നിലവിലുള്ള ശുചീകരണ മാലിന്യ സംസ്‌കരണ സംവിധാനം കാര്യക്ഷമമാക്കുന്നതിന്റെ ഭാഗമായി 2016-17വര്‍ഷത്തെ വാര്‍ഷിക പദ്ധതിയില്‍ ഉള്‍പ്പെടുത്തിയാണ് ഇവ വാങ്ങിയത്.
അടുത്ത വര്‍ഷം ഇന്ത്യയിലെ നഗരങ്ങളില്‍ ശുചിത്വത്തിന്റെ കാര്യത്തില്‍ കോഴിക്കോടിനെ പ്രമുഖ സ്ഥാനത്തെത്തിക്കുക എന്ന ലക്ഷ്യത്തോടെയുള്ള പ്രവര്‍ത്തനമാണ് കോര്‍പറേഷന്‍ ആസൂത്രണം ചെയ്തിരിക്കുന്നത്.
22.5 ലക്ഷം രൂപ ചെലവഴിച്ച് രണ്ട് എക്‌സ്‌കവേറ്ററുകളും 106 വീല്‍ബാരോ, കൈക്കോട്ട്, കട്ടറുകള്‍, പിക്കാസ്, അരിവാള്‍, ചൂല്‍, കൊട്ട, കമ്പിപ്പാര തുടങ്ങിയ ഉപകരണങ്ങളുമാണ് പുതുതായി വാങ്ങിയിട്ടുള്ളത്. ആരോഗ്യ സ്ഥിരം സമിതി അധ്യക്ഷന്‍ കെ.വി ബാബുരാജ് അധ്യക്ഷനായി. ഹെല്‍ത്ത് ഓഫിസര്‍ ഡോ. ഗോപകുമാര്‍, ഹെല്‍ത്ത് ഇന്‍സ്‌പെക്ടര്‍ ശിവദാസ് സംബന്ധിച്ചു.